2022, EDTL halakan ona liña eletrisidade ba uma-kain 4.322
DILI, 16 janeiru 2023 (TATOLI)—Eletrisidade de Timor-Leste, Empreza Públiku (EDTL,E.P), iha tinan 2022 hahú hosi janeiru to’o dezembru halakan ona liña eletrisidade ba komunidade uma-kain hamutuk 4.322, liuhosi Programa Eletrifikasaun Nasionál (PEN).
Komisáriu Ezekutivu Servisu Tékniku no Vogál Konsellu Administrasaun, iha EDTL,E.P, Latino Jerónimo, hateten, suku sira iha territóriu laran atu tomak ne’ebé atu asesu ba liña eletrisidade ne’e, bainhira transforma EDTL, sai empreza públika iha suku hamutuk 59.
“Suku 59 ne’e iha suku 20 resin no aldeia 66 mak ahi lakan ona. Tanba to’o dezembru 2022 tinan kotuk ne’e, EDTL,E.P ofisialmente halakan ona eletrisidade ba komunidade uma-kain 4.322. Ba fali tinan ida ne’e iha semana kotuk Prezidente EDTL,E.P kontinua inagura tan suku tolu ka haat. Hosi ne’e ita bele dehan katak eletrifika ona suku sira iha territóriu laran ne’e, bele atinje 91%,” Latino Jerónimo dehan ba Agência Tatoli, iha nia-knaar fatin, Caicoli, Dili, segunda ne’e.
Nia isplika, hosi suku 59 ne’e EDTL,E.P promove hotu ona, no liuhosi pakote 34 kobre suku 23, pakote 44 (suku 17) no pakote 36 (suku 23), no pakote ikus foin lansa ba suku tolu, mak hanesan Fatukalu iha munisípiu Manufahi, suku Nanu’e (Covalima) no suku Fatumakerek (Manatuto). Suku tolu ne’e, lansa ona no nia prosesu agora iha hela avaliasaun hodi to ba konkursu públiku.
Nia dehan, pakote ba suku sira remata ona. Agora hela mak aldeia 290 resin mak seidauk asesu ba liña eletrisidade. Aldeia sira ne’e daudauk ekipa hamutuk ho lideransa komunitáriu halo hela identifikasaun ba uma no distánsia.
“Bainhira ita indetifika mak distánsia besik kilometru ida ka rua hosi estrada boot ba aldeia sira ne’e, maka ekipa sei tun direitamente servisu hamutuk ho komunidade dada liña eletrisidade liu hosi Programa Eletrifikasaun Komunitáriu (PEK). Maibé haree ba distánsia dook, liu kilómetru rua, ita sei lori ba konkursu públiku,” Latino dehan.
Jornalista : Arminda Fonseca
Editora : Armandina Moniz
