BAUCAU, 16 janeiru 2023 (TATOLI) – Diresaun Territoriál Florestrál no Plantasaun Industriál Munisípiu Baucau kontinua sensibiliza importánsia hosi ai-kameli ba komunidade iha baze.
Koordenadór no xefe departamentu reprezentasaun florestrál no plantasaun industriál munisípiu Baucau, Pasqual Afonso Belo, esplika, tinan-ne’e laiha orsamentu hodi selebra loron mundiál no kuda ai-kameli tanba parte diresaun florestrál Baucau laiha orsamentu.
“Ita sempre fó atensaun no fó hatene ba komunidade kona-ba prevensaun hanesan labele tesi no sunu tanba importante iha futuru,” nia informa ba Agência TATOLI iha Vila Nova, segunda ne’e.
Florestrál Baucau identifika área sira hanesan poténsia ba ai-kameli kompostu hosi postu administrativu Baucau Vila, Venilale, Vemasse no Quelicai.
Hosi área hirak-ne’e parte diresaun seidauk identifika totál ai-kameli tanba maioria moris iha ai-laran no balun kuda hosi agrikultór sira.
Pasqual Belo rekoñese komunidade balun tesi ai-kameli ilegalmente, liuliu iha tempu kalan nune’e difikulta guarda florestrál atu identifika no halo apreensaun.
“Ita kontinua halo patrullamentu no kontinua fahe informasaun kona-ba prevensaun ai-horis hotu,” Pasqual Belo akresenta.
Parte diresaun iha tinan-2021 konsege kuda ai-kameli hamutuk hún 500 iha área Triloka maibé kuaze barak mak mate tanba laiha orsamentu manutensaun.
Diresaun Territoriál Florestrál no Plantasaun Industriál Munisípiu Baucau iha guarda floresta na’in-21 ne’ebé destaka nai’n-rua iha postu admistrativu sira no rua seluk hala’o atendimentu iha edifísiu munisipál.
Jornalista : Natalino Belo
Editór : Evaristo Soares Martins
