COVALIMA, 16 janeiru 2023 (TATOLI)–Diretór servisu Edukasaun Munisípal Covalima, Rui Amarál Suri Seran, segunda ne’e, hala’o abertura anu letivu 2023 ba ensinu eskola sekundária Tékniku Vokasionál (TEKVOK) São Jão Maria Vianney filiál foun iha munisípiu Covalima.
Diretór Servisu Edukasaun Munisípal, Rui Amarál Suri Seran, hato’o agradese ba fundasaun hodi suporta másimu ba fundadór hodi loke tan eskola ensinu Tékniku Vokasionál iha Covalima.
“Ita hato’o agradese ba fundasaun daraileman suporta masímu ba fundadór hodi estabelese tan eskola tékniku vokasionál importante ho vizionáriu. Eskola tekniku profesionál ne’e eskola ne’ebé koresponde ba nesesidade iha futuru Covalima nian. Ita iha Suai Suplay Base, baliza ho fronteira no aviasaun buat sira-ne’e presija tékniku,” Rui Amarál Suri Seran hato’o liuhosi nia diskursu iha EBC Ladi, segudan ne’e.
Estudante sira iha fasilidade no oportunidade mosu iha Covalima maibé estudante sira iha vontade ka lae, estabelese eskola tékniku ho departamentu sira hanesan informátika, tékniku sivíl no eletrisidade risku ba ema-nia vida maibé responde ba nesesidade iha Covalima.
Nia hateten, estabelese eskola kompleta ho fasilidade maibé estudante iha oportunidade no mós iha vontade di’ak atu apreende.
“Ohin ita presiza tau buat tolu ba ita-nia an hanesan oportunidade vontade no fasilidade, opotunidade mosu mai ona iha ita-nia leet, agora ita iha vontade ka lae tanba tékniku departementu eletrisidade risku ba ita-nia vida maib’e hodi responde ba nesidade iha Covalima,” nia dehan.
Prezidente Funsaun Daraileman, Fernando da Costa, husu ba inan-aman sira labele preokupa kona-ba baze legál tanba fundasaun hetan ona legalidade iha tinan 2022, hodi estabelese eskola São Jão Maria Vianney.
“Tanba ne’e, fundasaun prontu atu fasilita ita-boot nia oan sira-ne’ebé mak hakarak kontinua eskola iha universidade maibé ita-boot sira obriga oan sira tenke estuda bainhira estudante sira hetan klasifikasaun dahuluk, daruak no datoluk ne’e, fundasaun mós sei fasilita bolsa estudu ba estudante sira,” nia informa.
Estudante ho valor di’ak, bainhira inan-aman hosi estudante laiha kapasidade finanseira, fundasaun prontu atu apoiu, iha kompromisu inan-aman 50% no 50% hosi fundasaun, maibé estudante ne’e sei la servisu iha fatin seluk tenke servisu fali iha eskola São Jão Maria Vianney.
Eskola ESTV São Jão Maria Vianney estabelese uluk ho departamentu sira hanesan tékniku eletrisidade, tekniku kontrusaun sivil no informátika.
Fundadór ESTV São Jão Maria Vianney, Elizeu Gusmão esplika, harii eskola ne’e bainhira nia kontinua nia estudu iha ensinu superiór iha Universidade da Paz iha ona mehi atu harii eskola no ohin loron mehi ne’e sai duni realidade.
“Ha’u kontinua eskola ensinu superiór iha ona mehi atu harii eskola, ohin loron harii duni eskola tanba Saudozo Sesurai nia liafuan katak atu halo diak ba rai Covalima halo de’it, halo aat ba rai Covalima mak labele halo,” nia dehan.
Liafuan hosi Saudozo Alvaro do Nascimento Sesurai motiva no inspira fundadór ESTV São Jão Maria Vianney, Elizeu Gusmão, nia mehi hodi harii eskola iha munisípiu Covalima.
Aleinde inspira hosi Saudozo Alvaro do Nascimento inspira mós hosi Veterana Kasian ne’ebé ho nia edukasuan mínimu bele loke eskola iha munisípiu Liquiça ho nia fundu rasik no prosesu atu loke eskola ida-ne’e besik tinan ida.
Eskola Tékniku Vokasionál São Jão Vianney filiál funda hosi Elizeu Gusmão, ho totál profesór hamutuk na’in-16 ne’ebé kompostu hosi profesora na’in-lima, profesór na’in-11 ho nia estudante na’in-28.
Jornalista : Celestina Teles
Editór : Cancio Ximenes
