Eleisaun parlamentár: STAE-Governu sei kria kondisaun EhD vota mesak
DILI, 16 janeiru 2023 (TATOLI)—Diretór Jerál Sektretariadu Tékniku Administrasaun Eleitorál (STAE) Acilino Manuel Branco, hateten STAE esforsu atu ko’alia ho Governu nune’e bele fasilita Ema ho Defisiénsia (EhD) matan iha territóriu nasionál.
Notísia Relevante: STAE fó formasaun ba operadora sistema 130-resin atende resensiamentu eleitorál
Iha tinan kotuk, nia hateten, STAE halo peskiza hamutuk ho Komisaun Nasionál Eleisaun (CNE) no ho parseiru Unidade Nasionál Dezenvolvimentu Nasaun (UNDP) atu haree mekanizmu ne’ebé apropriadu hodi bele fasilita di’ak liután maluk ema ho defisiénsia sira atu vota mesak.
“Garante hela maluk defisiénsia sira-nia direitu no preokupasaun sira hodi kria liután kondisaun, nune’e bele vota mesak., enves tenke asisténsia hosi ema seluk. Ho ida-ne’e órgaun eleitorál kontinua rona preokupasaun sira hotu, ita espera katak iha prosesu alterasaun-lei ne’ebé mak la’o hela bele mós introdús medida foun sira balun para depois ita fasilita no garante ema ho kondisaun defisiénsia sira,” Diretór jerál STAE ne’e hateten ba Agência Tatoli liuhosi programa Entrevista Eskluziva iha studio Faról, segunda ne’e.
Tuir nia, iha parte tékniku nian ne’e preparadu no karik iha alterasaun-lei eleitorál ba mak introdús asuntu ne’e mak STAE iha kondisaun bele fasilita ema ho defisiénsia sira.
Liga ho maluk defisiénsia nia preokupasaun mós hanesan iha fulan rua ba kotuk STAE servisu hamutuk ho líder komunitária no organizasaun ne’ebé toma konta ema ho defisiénsia sira hodi garante maluk Ema ho Defisiénsia nia partisipasaun iha eleisaun liu-liu ba ema ho defisiénsia matan sira.
Antes ne’e, Diretór Ezekutivu Asosiasaun Halibur Matan Timor-Leste (AHDMTL), Gabriel Sousa, hateten kada tinan ema ho defisiensia aumenta ba beibeik no barak mak to’o ona idade maibé ladauk iha billete identidade no seidauk asesu mós ba subsídiu ema ho defisiénsia nian.
“Situasaun reál ema ho defisiénsia iha munisípiu barak mak seidauk asesu ba subsídiu no barak seidauk iha dokumentu liu-liu hanesan iha estatál ema ho defisiensia balun idade 20, balun 25 maibé sira rasik laiha kartaun eleitoral no laiha billete identidade,” nia dehan.
Nune’e, nia rekomenda nafatin ba Governu para tau seriedade ba ida-ne’e liu-liu ba asuntu defisiénsia.
Bazea ba sensu 2015 ema defisiénsia iha Timor-Leste hamutuk 38.118 ne’ebé kompostu hosi defisiensia matan ema hamutuk 14.828, defisiénsia tilun hamutuk ema 12.511, defisiénsia motora 7.466 no difisi’ensia psiko mentál 3.313.
Jornalista : Osoria Marques
Editór : Cancio Ximenes
