COVALIMA, 16 janeiru 2023 (TATOLI)–Administradór munisípiu Covalima, Francisco de Andrade, informa nia parte simu ona relatóiu hosi Diretór Planu Dezenvolvimentu Integradu Munisipál ema deskoñesidu sobu estraga irrigasaun foun Beigui ne’ebé lokaliza iha suku Lepo, postu administrativu Zumalai ne’ebé foin konstrui hosi kompañia Joel Amor.
“Ohin dadeer, ha’u simu ona relatótiu hosi diretór Programa Dezenvolvimento Integradu Munisipál (PDIM) katak irrigasaun la’ós aat, maibé ema deskoñesidu balun estraga irrigasaun Beigui ne’ebé konstrui hosi Kompañia Joel Amor,” Autoridade Covalima, Francisco de Andrade, informa ba Agência Tatoli, iha resintu eskola EBC Ladi, segunda ne’e.
Hafoin simu relatóiu hosi diretór PDIM Covalima, Afonso Nugueira Nahak, autoridade munisipál ne’e mós hasai despaixu ba administradór postu administrativu Zumalai, Rui do santos, ho nia xefe suku sira buka ema ne’e no hetan karik lori ba dalan justisa.
“Foin lalais mak ita finaliza konstrusaun irrigasaun ne’e, maibé ema deskoñesidu sobu tiha. Estadu gasta osan, ita labele admite ema ida-rua laiha responsabilidade hodi sobu fali irrigasaun refere,” nia hateten.
Tuir loloos komunidade Zumalai hato’o agradese tanba iha tinan ne’e bele halo konstrusaun irrigasaun, loloos ne’e tenke kuidadu hodi uza ba tempu naruk la’ós ho ema balun nia interrese sobu fali irrigasaun ne’e loloos labele.
Projetu konstrusaun irrigasaun Beigui ho naruk kilometru ida ka metru 1000 ho nia montante orsamentu hamutuk $89.406.
Projetu konstrusaun irrigasaun Beigui ne’e la uza orsamentu hosi rubrika kapitál dezenvolvimentu tinan fiskal 2022, maibé uza orsamentu restu projetu konstrusaun edifísiu postu administrativu Maucatar no rezidénsia Administradór Munisípiu Covalima nian.
Jornalista : Celestina Teles
Editór : Cancio Ximenes
