Eskola 17 iha Baucau sei inaugura iha tempu badak
BAUCAU, 16 janeiru 2023 (TATOLI) – Eskola hamutuk 17 iha munisípiu Baucau sei inaugura iha loron 27 fulan-janeiru liuhosi Programa Konstrusaun no Reabilitasaun Eskolár (PKRE) tinan-2022 nian
Diretór Servisu Munisipál Edukasaun Baucau, Augosto Ornai Ximenes, esplika, programa refere atinje ona pursentu 75 hosi totál projetu eskola hamutuk 29 iha munisípiu Baucau.
“Seluk atinje ona pursentu 75, balun pursentu 50 no balun mak seidauk atinje tanba implementa tarde,” Diretór Servisu Munisipál Edukasaun Baucau hateten iha Vila Nova, segunda ne’e.
Eskola 17 refere finaliza ona nune’e parte Ministériu Edukasaun Juventude no Desportu (MEJD) sei hala’o sorumutu iha aban, tersa, loron 18 fulan-janeiru hodi halo preparasaun ba inaugurasaun.
Ezekusaun ba programa refere atinje ona pursentu 75 no pursentu 25 mak hasoru difikuldade ho razaun tanba eskola balun implementa tarde tuir kondisaun klima no estrada inklui transferénsia orsamentu tarde hosi parte Ministériu Edukasaun, Juventude no Desportu (MEJD).
Eskola hirak-ne’ebé hahú tarde hanesan Lalabu, postu Laga, Osofulari, postu Baguia no Uadaboru, postu Quelicai tanba kondisaun klima no estrada difikulta transporta materiál konstrusaun ba fatin projetu.
Projetu refere hahú estabelese iha fulan-fevereiru tinan 2022 ho totál orsamentu aloka ba munisípiu Baucau hamutuk $3.001.683,69 ne’ebé kada eskola sei konstrui no reabilita edifísiu, sala aula no laboratóriu no sanitasaun.
Jornalista : Natalino Belo
Editór : Evaristo Soares Martins
