HNGV sei lansa ICU Movel iha fevereiru
DILI, 16 janeiru 2023 (TATOLI) – Diretór Ezekutivu Hospitál Nasionál Guido Valadares (HNGV), Alito Soares, dehan Hospital Nasionál Guidu Valadares (HNGV), Unidade Kuidadu Intensivu (ICU) Movel sei halo lansamentu iha fulan fevereriu nia-laran.
“ICU movel ne’ebé ita nia parseiru liuliu Governu America apoia ba ita iha fulan hira liu ba, ita sei halo lansamentu iha loron 9 fulan fevereiru tinan ne’e”, Diretór Ezekutivu HNGV, Alito Soares, informa iha HNGV, ohin.
Durante ne’e ekipa tékniku husi America fó ona formasaun ba profisionál saúde sira iha ICU oinsá uza ekipamentu sira ne’e.
“Entaun ita seidauk utiliza ICU movel tanba iha buat balun ne’ebé mak ita presiza kompleta ezemplu; hanesan oxijéniu no mós haris fatin”, relata.
Diretór Ezekutivu HNGV deklara departamentu ICU, daudaun ne’e, fatin baixa sei sufisiente hela hodi halo atendimentu ba pasiente sira ne’ebé ho moras grave.
“Banhira lansamentu hotu mak ita haree pasiente ne’ebé mak grave liu, bele utiliza ona iha tempu saida de´it”, Alito Soares afirma.
Nia dehan ICU movel ne’e, haree liu ba tratamentu espesialidade nian no kareta ida ne’e mós sei la´o ba munisípiu, depende ba kazu sira iha.
Antes ne’e, Governu no povu Estadus Unidos America (EUA) disponibiliza unidade kuidadu intensive ICU Movel ba HNGV hodi alarga kapasidade servisu saúde no fó kuidadu intensivu ba paseinte Covid-19 no ba populasaun vunerável sira.
Jornalista : Felicidade Ximenes
Editór : Zezito Silva
