Komunidade husu Governu hadi’a estrada iha Beiseuk
COVALIMA, 16 janeiru 2023 (TATOLI)–Reprezentante komunidade aldeia Fatuk Metan, suku Beiseuk, postu administrativu Tilomar, munisípiu Covalima, Tomasia Amaral Maia, husu ba Governu atu hadi’a estrada aat grave tanba difikulta abitante lori produtu lokál ba merkadu.
“Estrada di’ak hosi Suai ba iha postu Tilomar di’ak to’o de’it iha bairru Halis maibé liu ona ida-ne’e estrada aat hotu. Tanba ne’e, bainhira ami atu faan ami-nia produtu lokál ba iha merkadu defisil tebes ba ami,” Tomasia Amaral Maia hato’o ba jornalista sira, iha aldeia Fatuk Metan, segunda ne’e.
Governu liuhusi Ministériu Obra públika (MOP) tenke haree problema ne’ebé abitante sira enfrenta iha área rurál sira.
Motorista Anguna, Adriano Maia, reforsa no husu husu Governu atu hadi’a estrada tanba iha tempu udan difikulta sira atu halo movimentu transporte públiku hodi tula pasajeiru ba merkadu tanba haree kondisaun estrada grave.
“Ita ukun rasik an tinan 20-resin ona maibé komunidade hela iha área rurál kontinua halerik ba Governu atu hadi’a Estrada. Estrada iha postu administrativu Tilomar, Fatumea no fohorem bainhira tempu udan transporte públiku labele halo movimentu ba-mai,” nia dehan.
Abitante sira iha área rurál presiza de’it mak Governu hadia Estrada, nune’e bele lori produtu lokal ba merkadu hodi hetan osan atu sustenta família uma laran no mós selu aon sira-nia eskola.
Suku Beiseuk kompostu hosi aldeia hitu mak hanesan aldeia Foholulik, Maubisse, Baer, Fatuk-Metan, Nikir, Wala no Wetaba.
Antes ne’e, Ministru Obras Públika (MOP) Abel da Silva Pires esplika, estrada aat la’ós iha Covalima de’it, inklui mós iha munisípiu sira seluk.
Maibé atu hadi’a estrada tenke iha dezeñu di’ak no liuhosi prosesu mak ADN tenke halo verifikasaun, no iha osan maske burokrasia naruk tenke hadi’a estrada ho kualidade, nune’e labele gasta povu nia osan arbiru.
“Ha’u husu ba inan-aman sira pasiénsia estrada hahú hosi Bobonaro mai iha Alto Lebos, hosi Alto Lebos ba Fatululik to’o Tilomar loke ona konkursu no ninia dezeñu iha ona. Estrada hosi Alto Lebos to’o iha suku Ogues halo konkursu no atu halo dezeñu. Bainhira to’o ona iha ha’u-nia meza minitu ida-rua, ha’u asina maibé kuidadu iha pagamentu,” nia esplika.
Jornalista : Celestina Teles.
Editór : Cancio Ximenes
