Konstrusaun fatin pediatria-ICCU ho andar lima sei lansa iha 9 fevereiru
DILI, 16 janeiru 2023 (TATOLI) – Ministériu Saúde sei lansa iha 9 fevereiru kona-ba konstrusaun fatin pediatria, Intensive Cardiology Care Unit (ICCU) ho andar lima iha Hospital Nasionál Guido Valadares (HNGV).
“Iha loron 9 fevereiru, hahú lansa primeira pedra ba konstrusaun fatin pediatria ho ICCU, maibé hahú mobiliza ona rekursu sira no fasilidade sira”, Diretór Jerál Servisu Koorporativu MS, Marcelo Amaral, ba jornalista sira iha salaun HNGV, ohin.
Marcelo hateten MS entrega fatin konstrusaun pediatria no ICCU andar lima ba Empreza China Civil Engineer Contruction Corporation (CCECC) iha HNGV.
Nia esplika empreza ida ne’e hili husi komisaun nasionál aprovisionamentu liuhusi prosesu konkursu públiku no empreza China Civil Engineer Contruction Corporation (CCECC) mak manan ba projetu ne’e.
“Konstrusaun fatin pediatria no ICCU, iha Hospitál Nasionál Guido Valadares ho Orsamentu Jerál Estadu ne’ebé tau iha fundu infraestrutura ho alokasaun multi anuál ho montante milaun $9.3 ba durasaun kontrusaun tinan rua nia-laran”, diretór dehan.
Diretór jerál akresenta MS entrega ona obra ne´e ba empresa atu bele hahú ona servisu, nune’e mós ho empreza ne´ebé supervisiona mós bele hahú ona sira nia knaar.
“Ita mós sei halo negosiasaun ho parseiru sira hanesan Banku Mundiál atu sira bele kontribui ba kompra fasilidade médiku sira”, Nia revela.
Iha kontrusaun ne’e, entidade tolu hanesan Diretór HNGV, Empreza CCECC no Empreza ne´ebé supervisiona mak sei koordena di´ak atu fó kuida no seguransa ba pasiente sira liuliu movimentu ba mai, lian ka barullu sira, atu nune’e pasiente bele deskansa di´ak.
Iha fatin hanesan, Diretór Ezekutivu HNGV, Alito Soares, informa HNGV hahú harii ona projetu ne’ebé mak boot liga ho atendimetu kuidadu klíniku nian.
“Ami kontente tebes tanba planu kontrusaun ida ne’e kleur, maibé ikus realiza ona fatin andar lima ida ne’e ba labarik sira”, Alito agradese afirma.
HNGV sei koordena ho parte relevante sira, hanesan empreza kontrusaun, MS, Autoriedade Munisípiu Dili no Polísia Nasionál Timor-Leste atu kontrusaun ne’e la´o ba oin, tanba antes ne’e koordena ona ho Prezidente Autoridade Munisípiu Dili atu bele kolabora durante kontrusaun refere inklui parazen sira iha HNGV.
Jornalista : Felicidade Ximenes
Editór : Zezito Silva
