Pedro da Silva Fereira lidera servisu saúde munisípiu Viqueque
VIQUEQUE, 16 janeiru 2023 (TATOLI)— Pedro da Silva Fereira, hetan nomeasaun hosi Komisaun Funsaun Públiku (KFP), atu sai diretór Serbisu Saúde munisípiu Viqueque hodi troka Fancisco de Carvalho.
Desizaun ne’e liuhosi despaisu Prezidente KFP ho númeru 5282/2023/, ne’ebé iha redasaun hateten konsidera inforamasaun ne’ebé apresenta hosi Ministériu Adiministrasaun Estatál (MAE) ho númeru 477/GM-MAE/2022.
Iha serimónia termu entrega ne’e, Reprezentante Adiministradór munisípiu Viqueque, Cosme Sarmento, espera ho nomeasaun ne’e bele reforsa no mellora servisu saúde nian munisípiu Viqueque hodi fó atendimentu ba populasaun sira.
“Ha’u hanoin servisu saúde importante tebes tanba ka’er ema-nia. Nune’e ho diretór foun ne’e bele serbisu hamutuk ho funsionáriu sira hodi halo atendementu ba ita-nia povu Viqueque. Ha’u husu ba funsionáriu sira tenke serbisu hamutuk ho diretór saúde foun hodi lori serbisu saúde ba to’o iha komunidade sira iha baze”, Reprezentante ne’e afirma ba TATOLI iha munisípiu Viqueque, segunda ne’e.
Iha biban hanesan, Diretór sesante serbisu saúde munisípiu Viqueque, Francisco de Carvalho, afirma lideransa maka troka maulu, maibé sistema sei la troka no funsionáriu sira mós sei nafatin hodi halo atendimentu ba povu Viqueque.
“Durante iha ha’u-nia mandatu iha tempu naruk, ohin ha’u entrega fali serbisu ida-ne’e ba ha’u-nia maluk hodi lidera fila-fali saúde munisípiu Viqueque hodi kontinua halo atendementu ba ita-nia povu iha baze. Ha’u sei iha ne’e hodi ita ajuda malu serbisu saúde”, nia kompromete.
Entretantu, Diretór foun servisu saúde munisípiu Viqueque, Pedro da Silva Fereira, hato’o agradese ba buat hotu no sei serbisu hamutuk ho pesoál saúde hotu ne’ebé hala’o kna’ar iha sentru saúde sira hodi halo atendimentu ba populasaun sira iha munisípiu Viqueque.
“Ha’u nafatin presiza pesoál saúde sira hodi serbisu hamutuk, hodi tau matan ba ita-nia povu. Nune’e nia husu pesoál saúde sira tenke loke postu saúde sira durante 24 oras hodi fó atendimentu saúde ba ita-nia komunidade”, nia afirma.
Totál munisípiu Viqueque iha sentru saúde hamutuk lima ho rekursu umanu hamutuk 40 kompostu hosi adiministrasaun, lojístika no pesoál saúde.
Iha serimónia entrega kargu xefia ba Diretór foun ne’e hetan partisipa hosi xefe sentru saúde lima, pesoál saúde no funsionáriu adiministrasaun saúde munisípiu Viqueque.
Jornalista: Vitorino Lopes da Costa
Editór : Florencio Miranda Ximenes
