DILI, 16 janeiru 2023 (TATOLI)– Prezidente Parlamentu Nasionál (PPN), Aniceto Longuinhos Guterres, segunda ne’e, hasoru malu ho Primeiru-Ministru (PM), Taur Matan Ruak, hodi koordena serbisu liliu inisiativa Governu nian ba lejizlativu sira, nune’e bele ajusta ho kalendáriu Parlamentu Nasionál nian.
“Ami-rua Primeiru-Ministru ko’alia kona-ba planu lejizlativu iha tempu restu hosi fulan-janeiru to’o lejizlatura foun mosu, tanba Governu nia inisiativa ba proposta lei ruma ne’ebé atu submete mai karik ami hakarak hatene di’ak liu no Parlamentu bele ajusta nia kalendáriu lejizlativu iha tempu restu lejizlatura ne’ebé depende Eleisaun hotu bainhira”, Prezidente PN, Aniceto Guterres, relata ba jornalista-sira, iha Parlamentu Nasionál.
Nia hatutan, tuir lejizlatura normál ne’e hotu iha 14 fulan-setembru, ne’e sura ho tempu resesu fulan-rua, hanesan sesaun lejizlativa karik funsionamentu normál ne’e to’o 14 jullu entaun presupostu ba kalendáriu lejizlativu Parlamentu nian ne’e inklui inisiativa hosi Parlamentu ho inisiativa sira hosi Governu nian hanesan proposta lei sira para Parlamentu bele halo kompleta iha tempu badak.
“Tanba ne’e mak ami presiza ajusta ami-nia kalendáriu, proposta lei sira mai hosi Governu ne’e ami tenke koordena ho Governu”, nia tenik.
Maske nune’e, reuniaun koordenasaun entre Ministru Prezidénsia Konsellu Ministru, no Ministru Asuntu Parlamentár no Komunikasaun Sosiál ho meja komisaun espesializada iha 26 janeiru 2023.
“Lei sira ne’ebé iha tiha ona, hanesan revizaun Lei Pensaun Vitalisia tama iha Parlamentu Nasionál antes ha’u asume Prezidénsia, no ha’u hateten ba Primeiru-Ministru mós katak lei sira ne’ebé tama tiha ona ne’e ami tenke rezolve hotu, sei la lakaduka, katak aprova, haruka tiha ba Prezidente Repúblika atu veta ka promulga ne’e Prezidente nia kompeténsia, maibé iha tempu restu ne’e karik iha proposta lei ruma tama tan ami bele ajusta hotu para sira ne’ebé tama uluk tiha ona, agora iha hela Parlamentu no balun submete mai tan para ami rezolve iha tempu ne’e”, nia subliña.
Bainhira husu kona-ba dadaun iha proposta lei hirak mak meja Parlamentu Nasionál, segundu órgaun Soberanu ne’e la sita klaru, no hateten de’it katak, iha lei barak.
Jornalista : Antónia Gusmão
Editór: Rafael Ximenes de A. Belo
