iklan

EKONOMIA, BAUCAU, HEADLINE, MUNISÍPIU

Projetu PDIM tinan 2023 iha Baucau hahú iha faze aprovizionamentu

Projetu PDIM tinan 2023 iha Baucau hahú iha faze aprovizionamentu

Prezidente Autoridade Munisipál Baucau, Olivio 'Bou-Lesa' Freitas. Imajen Agência TATOLI/Natalino Belo.

BAUCAU, 16 janeiru 2023 (TATOLI) – Projetu Programa Dezenvolvimentu Integradu Munisipál (PDIM) tinan 2023 nian iha munisipál Baucau hahú iha faze aprovizonamentu molok tama ba konkursu públiku.

Prezidente Autoridade Munisipál Baucau, Olivio ‘Bou-Lesa’ Freitas, esplika, orsamentu aprovadu no hein atu halo konstrusaun tanba daudaun ne’e iha ona pre-kualifikasaun no sei kontinua ba prosesu aprovizionamentu.

“Aprovizonamentu la’o ona, hein atu loke konkursu públiku,” Prezidente Autoridade Munisipál Baucau hateten iha Vila Nova, segunda ne’e.

Bou-Lesa konsidera projetu PDIM refere presiza kontrolu tanba fundu ne’e nu’udar orsamentu povu nian tanba ne’e tenke kuidadu iha ezekusaun.

Projetu PDIM hamutuk lima iha tinan-2023 komposta hosi konstrusaun kiik jardín  no estasionamentu iha salaun apuramentu, konstrusaun edifísiu patrimóniu no lojístika, konstrusaun edifísiu servisu edukasaun.

Nune’e mós reabilitasaun edifísiu eis administrasaun públiku ba postu administrativu Baucau Vila no projetu konstrusaun moru haleu iha merkadu Tuanau ne’ebé reapropria ba orsamentu tinan 2023.

“Importante, ami tuur hamutuk halo diskusaun, ne’ebé presiza atu halo tenke halo, tanba prioridade,” Olivio Freitas akresenta.

Olivio Freitas argumenta, projetu konstrusaun moru merkadu Tuanau hein halo pagamentu pursentu 10 tanba iha faze finalizasaun, reabilitasaun edifísiu administrasaun postu Baucau tanba nu’udar patrimóniu estadu ne’ebé konstrui iha tempu okupasaun portugés.

Edifísiu patrimóniu lojístika importante tanba atu asegura materiál no ekipamentu patrimóniu munisípiu Baucau nian no konstrusaun ba edifisiu edukasaun ensensial tanba iha funsionáriu barak ne’ebé hodi atendimentu ba setór edukativa iha Baucau.

Totál orsamentu ba projetu PDIM tinan 2023 ho montante $ 292.647 ne’ebé fahé ba kada projetu hanesan kompostu konstrusaun kiik jardín no estasionamentu iha salaun apuramentu munisípiu hamutuk $6.210, konstrusaun edifísiu patrimóniu no lojístika hamutuk $ 56.641.

Nune’e mós reabilitasaun edifísiu eis administrasaun públiku ba postu administrativu Baucau Vila $58.000 no konstrusaun edifísiu servisu edukasaun munisipál hamutuk $ 135.762.

Jornalista : Natalino Belo

Editór         : Evaristo Soares Martins

iklan
iklan

Leave a Reply

iklan
error: Content is protected !!