Top

Reprezentante povu husu Governu tau atensaun ba problema estrada

Estrada iha pouzada Hatubuilico nia sorin ne’ebé aat. Imajen/Facebook: Racom Maubisse Mauloko.

DILI, 16 janeiru 2023 (TATOLI)—Reprezentante povu iha uma fukun Parlamentu Nasionál (PN), segunda ne’e, liuhosi reuniaun plenária levanta problema estrada nune’e husu Governu atu tau atensaun.

“Ami foti bebeik ona estrada ida iha suku Loidahar ba to’o iha Darulete tesik ba suku Letola no ba to’o suku Asumanu ne’ebé liga mós Leorema-Liquiça, estrada ne’e kondisaun aat tebes,” Deputada Fretilin, Lídia Norberta, levanta iha sala plenária iha PN.

Foin lala’is família hosi matebian lori mate isin traballadór ida servisu iha Korea transporte ba uma knua Asumanu bainhira liu-hosi dalan ne’ebá sira hulan de’it kaixaun, ida-ne’e akontese fila-fila ona la’ós foin akontese.

“La’ós de’it ida-ne’e, ezemplu fahe subsídiu $200 no uma PNDS empata tanba de’it Estrada,” nia dehan.

Aleinde ne’e, iha mós suku Lukulai dalan aat tebes, tuir fali suku Leohitu tama ba Cova tun ba iha sede suku nian dalan kuak boot ho risku boot no seluk mós Hatubuiliku-Ainaro mós dalan aat loos.

“Ida-ne’e impede buat barak, nune ’e ami rekomenda Governu atu haree,” nia hateten.

Deputada PLP, Maria Angelina Sarmento, dehan iha vizita eleitorál ne’ebé halai iha suku Lukulai-Liquiça ne’e estrada aat no perigozu tebes.

“No estrada hahú hosi Loidahar, Darulete mai fali Lukulai to’o liu Asumanu no Leutala ne’e estrada perigozu tebes. Agora daudaun ho programa PNDS no Programa Mão de Obra Postu Administrativu (PMOPA), komunidade halo ona projetu ida-ne’e ho kalan maibé la seguru, tanba aleinde estrada nakonu ho taho no subida, rai mamar entaun temporariamente ita bele uza  ho sistema planu ne’e. Maibé se di’akliu fó ona prioridade ba estrada rurál liu-liu iha Liquiça foho,” nia dehan.

Deputada CNRT, Domingos Lemos, levanta kondisaun estrada iha Gleno-Atsabe.

“Estrada ne’ebé foti bebeik ona iha ne’e, estrada Gleno-Atsabe ho Leteho. Hanoin foin lalais Ministru Obra Públika ba halo ona levantamentu dadus ka observa, iha tempu badak atu konstrui ne’e hatene bainhira karik tanba udan difikulta transporte ki’ik movimentu ba-mai,” nia hateten.

Deputada CNRT, Maria Fernada Lay, kestiona katak estrada nasionál de’it MOP la halo manutensaun, se iha Liquiça estrada balun aat no kleuk, tuir loloos atu ninia manutensaun ne’e tenke iha.

Hatán ba preokupasaun ida-ne’e, Ministru Trata Asuntu Parlamentár no Komunikasaun Sosiál (MAPKOMS), Francisco da Costa Jerónimo, hateten relasiona ho ponte no estrada ne’e nia parte sei fó hanoin fali ba ministru tutela.

Maibé, Nia informa, kona-ba estrada rurál iha kada munisípiu iha hotu ona nia responsabilidade liu-liu estrada rurál hosi munisípiu ba postu no suku servisu hamutuk ILO apoiu no Uniaun Eurpeia sira iha munisípiu mak deside ida-ne’ebé halo uluk, tan ne’e loos Ministéiru Obra Públika (MOP) halo kontrola haree no desizaun sira iha ona kraik.

 Jornalista : Nelson de Sousa  

Editór        : Cancio Ximenes

Publisidade

Leave a Reply

Latest Post

error: Content is protected !!