2022 EDTL, E.P monta ona lampu iluminasaun hamutuk 840
DILI, 17 janeiru 2023 (TATOLI)—Eletrisidade de Timor-Leste, Empreza Públika (EDTL,E.P), iha tinan 2022 sosa no monta ona lampu iluminasaun rede eletrika hamutuk unidade 840. Lampu hirak ne’e monta iha kapitál Dili, inklui ba munisípiu sira.
“Ko’alia kona-ba lampu iluminasaun iha tinan kotuk ita halo aprovizionamentu sosa lampu iluminasaun hamutuk unidade 480. Lampu hirak ne’e monta ona iha estrada protokulu sira iha kapitál Dili no monta mós ba estrada sira ne’ebé la’os estrada publiku,” Komisáriu Ezekutivu Servisu Tékniku no Vogál Konsellu Administrasaun, iha EDTL,E.P, Latino Jerónimo, dehan ba Agência Tatoli, tersa ne’e, iha nia knaar-fatin, Caicoli, Dili.
Nia dehan, lampu iluminiasaun ne’e rasik, ba kapitál Dili ekipa sei kontinua halo identifikasaun ba fatin hirak ne’ebé presiza monta tan. Ho ida ne’e, tinan 2023 ne’e identifika hotu sei monta lampu refere. Lampu hirak ne’e mak EDTL,E.P identifika aat maka, ekipa sei kontinua hadi’a.
“Daudaun ne’e mós ita kontinua halo identifikasaun ba fatin sira ne’ebé iha movimentasaun maka’as,” nia dehan.
Komisáriu ne’e mós dehan, aleinde EDTL,E.P monta lampu iluminasaun iha kapitál Dili, sira mós monta ba estrada protokolu kapitál iha munisípiu lima ne’ebé konklui ona mak hanesan Lautém, Baucau, Manatuto, Covalima, no Liquiça.
Ba fali munisípiu sira seluk hanesan, Ermera sei prosesu la’o hela, Manufahi instalasaun la’o ona no Aileu tama prosesu konkursu públiku inklui munisípiu sira seluk.
“Bainhira konkursu públiku, ita sei iha prosesa sasán ba monta, ba munisípiu sira ne’e agora ita foku uluk lai ba estrada protokolu sira. Bainhira ida ne’e hotu ona ita haree osan iha mak kontinua ba fali estrada protokolu iha postu administrativu sira seluk,” nia dehan.
Nia hateten, iha kapitál Dili, aleinde EDTL,E.P monta lampu iluminasaun, ekipa EDTL mós fó konkursu públiku ba kompañia mak monta solar sel ne’e iha kapitál Dili, hahú hosi Otél Arbiru to’o Motael no kontinua ba ponte BJ Habibie.
“Ita espera tempu badak, bele monta ona tanba kompañia manán na’in iha ona. Ita kontratu kompañia mak sosa no monta, iha kapitál, no kompañia ne’e mak E724 Unip,Lda. Ita kontrata sira ho montante osan $171.717,10,” Latino dehan.
Jornalista : Arminda Fonseca
Editora : Armandina Moniz
