DILI, 17 janeiru 2023 (TATOLI) – Eis-Primeiru-Ministru, Kay Rala Xanana Gusmão, sente triste ba falesimentu Shirley Shackleton ne’ebé hadomi no suporta Timor-Leste.
Iha momentu lutu ne’e, Xanana tatoli domin no suporta ba Evan (Shirley no Greg) nia oan hodi hada’et ba nia família no belun sira.
“Shirley dedika nia moris tomak, atu luta ba lia loos kona-ba nia la’en jonalista Greg Shackleton ne’ebé mate hamutuk ho nia kolega australianu sira, Gary Cunningham, Tony Stewart, Malcolm Rennie no Brian Peters iha Balibo, loron 15 fulan Outubru tinan 1975”, Tuir komunikadu ne’ebé TATOLI asesu husi Gabinete Media, eis-PM.
Xanana hateten Shirley ajuda relata lia-los trájiku katak jornalista ne’ebé koñesidu ho “Balibó V” oho husi militár Indonézia no matebian nunka tauk atu negosia ho Governu, hodi kontesta militár Indonézia.
Lider nasionál ne’e rekorda katak Shirley lidera kampaña hodi divulga sofrimentu husi timoroan sira, durante tinan 24 nia-laran no depois independénsia dala barak mai Timor-Leste no simu nia hanesan família.
Ba Xanana, matebian inspira timoroan husi ninia determinasaun no nunka tauk atu buka lia-los, ho ninia karizma ne’ebé extra-ordináriu hodi luta bá justisa Balibo V no mós ba povu Timor-Leste, nune’e nia merese duni atu distinge ba nia, medalla Ordem de Timor-Leste.
Entretantu, Shirley mos apoia estabelesimentu Balibo House Trust durante governasaun ne’ebé lidera husi Primeiru-Ministru Australia, Steve Bracks no nomeada sai membru board instituisaun ne’e, hodi homenajeia Balibo V no apoia komunidade Balibo, Munisípiu Bobonaro.
Legadu husi matebian mak restaurasaun bandeira australiana iha Balibo (fatin akontesimentu Balibo V), harii Sentru Estudu Komunitáriu, sala ba prosesu aprendizajen, ekipamentu iha eskola 4, kria Klínika Nehan iha Balibo, Hotel iha Forte Balibo no kria foin lalais ne’e, muzeu veteranu iha Forte Balibo.
Jornalista : Felicidade Ximenes
Editór : Zezito Silva
