DILI, 17 janeiru 2023 (TATOLI)–Diretór Jerál Ministériu Solidariedade Sosiál no Inkluzaun (MSSI), Floréncio Pina Dias Gonzaga, hateten bainhira bolsa da mãe jersaun foun mosu ne’e Governu deside taka tiha bolsa da mãe atual kondisional iha 2022 tanba la fó benfísiu ba komunidade.
“Bolsa da mãe atual kondisional ita halo ona rejistu, tanba tuir peskiza ne’ebé ita-nia ajensia balun halo katak programa bolsa da mãe atual kondisional ladún fó benefísiu másimu ba ita-nia benefisiáriu sira,” Diretór Jerál MSSI ne’e hateten ba Agência Tatoli liuhosi programa Entrevista Eskluziva iha studio Faról, tersa ne’e.
Tuir nia, ida-ne’e akontese tanba dala ruma mós tanba osan ne’ebé mak atribui ba sira la sufisente ba sira-nia nesesidade ka inan-aman mak halo jestaun mak la to’o, entaun labele duni atu benefísia sira-nia nesesidade.
“Ita hotu hatene programa Governu nian hotu fó benfísia ba nia povu maibé ita hakarak muda kondisaun balun ne’ebé mak ligadu ho bolsa da mãe jerasaun foun, katak uluk idade 6 to’o 17 maibé agora lae, hahú hosi inan gravida depois moris no hahú konta hosi idade zero to’o idade tinan neen (6),” nia dehan.
Nune’e programa bolsa da mae atuál kondisionál refere ne’e sei esklui automatikamente tanba labarik ida bainhira to’o idade 17 ne’e sei la hetan direitu hodi simu subsídiu.
Governu aloka osan millaun $5 ba programa bolsa da mãe atuál kondisional ho benefisiáriu hamutuk 48.000.
Jornalista : Osória Marques
Editór : Cancio Ximenes
