Administradór postu administrativu haat iha Viqueque simu ona karreta
VIQUEQUE, 17 janeiru 2022 (TATOLI)— Ministériu Administrasaun Estatál (MAE) liuhosi Adiministradór Munisípiu Viqueque, tersa ne’e, distribui karreta haat ba Administradór Postu administrativu haat hanesan Uatulari, Uatucarbau, Ossu no Viqueque vila hodi fasilita serbisu administrasaun nian.
Iha serémonia distribuisaun ne’e, Administradór Munisípiu Viqueque, Januario Soares “Bolly”, husu ba administradór postu sira no funsionáriu sira atu kuida didi’ak karreta no ekipamentu hirak ne’e ho di’ak hodi utuliza ba fó atendimentu ba públiku.
“Ha’u husu imi tenke kuidadu ho didi’ak hodi utuliza ba serbisu administrasaun nia hodi fó atedimentu ba populasaun iha munisípiu Viqueque ne’e”, hateten Administradór munisípiu Viqueque iha salaun administrativu Viqueque, tersa ne’e.
Aleinde ne’e, Administradór munisípiu ne’e mós entrega komputadór 18 ba ajente administrasaun ne’ebé rekrura iha tinan 2022 hodi reforsa serbisu iha munisipál.
Administradór Bolly dehan antes ne’e administradór postu lima hanesan Uatulari, Uatucarbau, Ossu no Viqueque Vila inklui Lacluta simu ona veíkulu, maibé karreta nia kondisaun mak avaria hotu ona.
“Antes ne’e, ita-nia adiministradór postu lima simu uluk ona, maibé karreta sira-ne’e ho kondisaun aat hotu ona, ne’ebé sira hatama fali ba munisípiu hodi tama prosesu leilaun. Nune’e karreta laiha ne’e implika mós ba serbisu administradór sira-nia iha postu. Tan ne’e, ha’u hanoin presiza karreta hodi reforsa administradór sira-nia serbisu”, katak nia.
Administradór postu lima ne’e presiza simu duni karreta atu hala’o serbisu tanba ho kondisaun estrada liga ba postu no ba suku sira-ne’e kondisaun aat.
“Tan ne’e, ha’u husu motorista sira kuidadu karreta no uza ba atividade serbisu nian, labele uza ba atividade privada sira seluk,” katak nia.
Munisípiu Viqueque simu karreta hosi Patrimoniu Estadu ho unidade haat ho marka Hilux no Prado ida. Daudaun ne’e kareta ida maka sei iha ofisina nasionál, kareta ne’ebé munisípiu Viqueque simu hamutuk kareta lima.
Iha biban hanesan, Administradór Uatucarbau, Alfredo dos Santos, agardese ba Governu tanba bele apoia ona karreta hodi fasilita serbisu administrasaun nian.
“Ha’u sente karreta ne’e bele fasilita ona ba ha’u-nia serbisu liuliu hala’o ha’u-nia kna’ar nu’udar liman-ain Governu nian iha baze”, nia agradese.
Jornalista : Vitorino Lopes da Costa
Editór : Florencio Miranda Ximenes
