AMC sei kontinua fó formasaun ba PAAS iha Covalima
COVALIMA, 17 janeiru 2023 (TATOLI)–Administrasaun munisípiu Covalima (AMC) liuhosi Dirasaun Servisu Munisipal Apoiu ONG sei kontinua fó formasaun kona-ba realiza reuniaun konsellu suku hodi foti dezisaun no halo akta reuniaun ba Pesoál Apoiu Administrasaun Suku (PAAS) no xefe suku sira iha Covalima.
“Ami tenke fó formasaun ba sira oinsá realiza reuniaun konsellu suku, foti desizaun konsellu suku balun seidauk kompreende. Hafoin realiza reuniaun, sira bele halo akta. Ami tenke fó formasaun nune’e sira bele hatene di’ak liután,” Diretór Servisu Munisipál Apoiu ONG, Agustinho Mendonça “Ran Nakali”, hateten ba Agência Tatoli iha nia kna’ar fatin, Sukaer Laran, tersa ne’e.
Maske iha tinan 2022 fó ona formasaun ba xefr suku ho PAAS sira kona-ba oinsá utiliza komputadór, líder komunitária kona-ba lei númeru 9/2008 no oinsá atu prenxe livru 18 ne’ebé mak distribui ona ba sira.
Livru 18 ne’e Pesoál Apoiu Administrasaun Suku (PAAS) sira prenxe ona livru populasaun prenxe hotu ona, maibé livru foti desizaun suku no konsellu suku presiza fó formasaun ba sira hosi hasa’e sira-nia koñesementu tanba balun seidauk kompreende.
Servisu Munisipal Apoiu ONG iha tinan 2022 fó formasaun ba PAAS sira foku ba oinsá atu utiliza komputadór iha postu administrativu hitu (7) iha suku 30.
Formasaun faze dahuluk ne’e hala’o iha postu administrativu Fohorem hodi akumula xefe suku sira hosi postu administrativu Fatululik, Fatumea, Tilomar no Fohorem.
Faze daruak hala’o iha Administrasaun Munisípiu Covalima hodi akumula xefe suku sira hosi postu administrativu Zumalai, Maucatar no Suai.
Durante fó formasaun ne’e, uza orsamentu $3,200-resin ne’ebé nia ezekusaun atinje ona 100%.
Jornalista : Celestina Teles
Editór : Cancio Ximenes
