BOBONARO, 17 janeiru 2023 (TATOLI) – Diresaun Servisu Edukasaun Munisipál Bobonaro hetan alokasaun orsamentu hosi Autoridade Munisípiu hamutuk $1,860,999.84 hodi implementa programa merenda eskolár ho totál loron efetivu 164 ba tinan 2023 ne’ebé tuir planu sei realiza iha tempu badak.
Diretór servisu Edukasaun Munisipál Bobonaro, Crispim Lopes Moniz, subliña hosi montante ne’e fahe ba nível pre-eskolár 41 ho valór rihun $155,256 no ensinu Bazíku 135 ho valór orsamentu $1,762.708.
Notísia relevante: Implementasaun merenda eskolár iha Covalima sei hahú iha 19 janeiru
“Ita-nia orsamentu sei aloka ba loron efetivu hamutuk 164 dias, kada nível rua ne’e loron hanesan hotu,” Crispim Moniz informa ba jornalista sira, iha kna’ar-fatin Bairru Maravilha, suku Odomau, segunda ne’e.
Dirijente edukasaun munisípiu Bobonaro ne’e haklaken, totál estudante ne’ebé sei asesu programa refere hamutuk 27,018 komposta hosi nível pre-eskolár 2.194 no ensinu báziku 24,824.
Crispim haktuir, matadalan ezekusaun programa merenda eskolár tinan ne’e komesa sa’e kada alunu loron ida hetan sentavu 0,42 hosi montante ne’e fahe ba item rua, komposta hosi konsumu alimentár no administrasaun.
“Ba alimentár nia ne’e kada alunu sentavu 0,35, enkuantu aloka ba administrasaun ne’e sentavu 0.7. Hosi montante ne’e aloka ba ai-maran nian sentavu 0.1, bee-moos sentavu 0.1, deterjente sentavu 0.1, atubele fase bikan sira-ne’e,” nia katak.
Nune’e mós sentavu 0.1 ba transporte, fornesedór sentavu 0.1, depois sentavu 0.2 ba ekipa jestaun programa merenda eskolár,” nia esplika.
Enkuantu orsamentu refere sei jere hosi Ekipa Jestaun Programa (EJP) merenda eskolár komposta hosi koordendór na’in-ida, pontu fokál na’in-tolu, tezoreira ida inklui mós koziñeira sira-ne’ebé daudaun ne’e estabelese ona ekipa 23 iha munisípiu Bobonaro laran tomak.
Enkuantu ekipa ne’e rasik forma bazea ba enkontru ne’ebé eskola hamutuk ho konsellu país no lideransa komunitária sira.
“Ekipa Jestaun Programa Merenda Eskolár sira sei loke konta bankária, hafoin ida-ne’e selebra kontratu ho prezidente autoridade maka osan ne’e kanaliza direitamente ba konta bankária EJP nian, sira mak sei jere programa ne’e,” nia akresenta.
Notísia relevante: Autoridade munisipál introdús implementasaun merenda eskolár iha Baucau
Jornalista : Sérgio da Cruz
Editór : Evaristo Soares Martins
