COVALIMA, 17 janeiru 2023 (TATOLI)–Joven sira iha Covalima ho inisiativa rasik harii gazebo iha tasi ibun Suai Loro hodi pomove turizmu kominitária iha postu administrativu Suai, munisípiu Covalima hodi atrai turista sira.
Xefe suku Suai Loro, Martinho Mendonça, hateten joven sira inisiativa hodi harii gazebo iha tasi ibun Suai Loro, ne’ebé hetan apoiu fundu orsamentu faze dahuluk $18,000.00 hosi Ministériu Turizmu Komésiu no Indústria .
“Ha’u hakarak informa joven-sira iha inisiativa forma grupu hodi harii gazebo iha suai loro,ne’ebé hetan apoiu orsamentu husi Ministériu Turizmu Komésiu no Indústria,” Martinho Mendonça hateten ba Agência Tatoli iha suku Suai Loro, tersa ne’e.
Joven sira harii gazebo ne’e ho obejetivu atu atrai turista iha rai-laran no rai-li’ur atu bele vizita hodi bele hetan rendimentu, ne’ebé sira hahú harii gazebo molok atu tama loron boot natál no tinan foun.
Orsamentu faze dahuluk $18,000.00 ba grupu no harii ona gazebo ne’ebé atinje ona 46% ho razaun tanba harii gazebo finaliza ona hein de’it ona harii fatin atu hasai fotografia.
Diretór Servisu Munisipal Jestaun Merkadu no Turizmu, Vitorino do Carmo hateten, joven-sira inisiativa harii gazebo iha tasi ibun Suai Loro ne’e, hetan apoiu fundu hosi dirasaun jerál Turizmu kominitária.
“Foin lalais, iha fulan-novembru, ha’u ho ha’u-nia xefe departamentu halo konsulta jerál ho dirasaun jerál turizmu komunitária iha nasional, sira foin fó koñesimentu ba ami kona-ba joven sira nia inisiativa harii gazebo iha tasi ibun Suai Loro,” nia dehan.
Munisípiu covalima iha área turizmu sira hanesan Turizmu Komunitária, turizmu relizioju, turizmu istóriku no seluk tan.
Munisípiu Covalima iha postu administrativu hitu hanesan Fatululik, Fatumea, Fohorem, Tilomar, Maucatar, Zumalai no Suai ho nia suku 30 no aldeia hamutuk 148.
Suku Suai Loro ho totál uma kain 1,168 ho nia aldeia sira hanesan Loro iha uma kain 411, Mane Ikun 247, Lo’o 212, Sukabi Laran 158 no Akar Laran140, ho totál populasaun iha suku Suai Loro hamutuk 4,654 no hosi númeru ne’e feto na’in-798 no mane na’in-787.
Jornalista : Celestina Teles
Editór : Cancio Ximenes
