DILI, 17 janeiru 2023 (TATOLI)— Eletrisidade de Timor-Leste, Empreza Públika (EDTL,E.P) husu ba kompañia privadu sira ne’ebé manán konkursu públiku hosi Governu la liuhosi EDTL,E.P antes atu monta ahi fatin turístiku sira tenke koopera ho EDTL,E.P hodi hatudu dezeñu atu nune’e bele kontrolu.
Komisáriu Ezekutivu Servisu Tékniku no Vogál Konsellu Administrasaun, iha EDTL,E.P, Latino Jerónimo, husu ba kompañia sira presiza halo kooperasaun antes atu monta ahi iha fatin turístiku. Tanba iha ona akontesimentu hanesan, foin lalais fiu soke labarik ida to mate iha Santuáriu João Paulo II, Tasi-Tolu. Ho ida ne’e EDTL,E.P labele hatene tanba iha santuáriu refere ahi ne’ebé iha, la’os projetu EDTL nian maibé, kompañia sira ne’ebé manán projetu kontratu ho Governu mak monta.
“Ha’u husu ba kompañia manán na’in sira ne’ebé manán konkursu la liuhosi EDTL,E.P monta ahi iha fatin turístiku no santuáriu sira iha kapital, Dili no munisípiu sira tenke koopera ho EDTL. Fó imi-nia dezeñu sira ne’e hotu nune’e ita bele haree no servisu hamutuk buat ruma bele halo manutensaun, tanba projetu sira ne’e la’os hosi EDTL,E.P,” Latino Jerónimo dehan ba Agência Tatoli, iha nia knaar-fatin, Caicoli, Dili, tersa ne’e.
Nia dehan, durante ne’e kompañia privadu sira manán konkursu públiku halo instalasaun ahi iha fatin turístika sira, hanesan iha Cristo Rei, João Paulo II no fatin sira seluk bainhira sira remata sira-nia atividade la hato’o ba EDTL,E.P nomós la entrega relatóriu ka dezeñu mai ba EDTL.
Nia husu atu evita labele akontese tan akontesimentu sira ne’e mak, ba oin kompañia sira tenke koopera ho EDTL,E.P, tanba baibain ne’e sira monta tiha ahi, bainhira aat bolu EDTL,E.P ba hadi’a maibé dezeñu sira EDTL la hatene.
Jornalista : Arminda Fonseca
Editora : Armandina Moniz
