DILI, 17 janeiru 2023 (TATOLI)—Membru Parlamentu Nasionál (PN) husu autoridade relevante investiga kle’an no prosesa ema sivíl hanesan eis Ministru Interiór (MI), Longuinhos Monteiro, ne’ebé rai orma iha uma.
Notísia Relevante: Komisáriu Faustino: Lei la autoriza ema sivíl rai arma iha uma
“Primeiru, louva pesoál seguransa servisu ne’ebé hala’o buka informasaun tenta no hetan duni fatin liu-liu kazu subar (kilat) hanesan kolega sira dehan ohin, ita tenke investigasaun kle’an hodi prosesa. Hanorin kedas, nune’e lidér sira -ne’ebé halo hanesan ne’e tenke iha investigasaun kle’an, subar ne’e oin seluk,” Deputadu Fretilin, Antoninho Bianco, hateten liuhosi reuniaun plenária PN, tersa ne’e.
Nia dehan, regra prevalese ba ema hotu la haree ba eis mekbru Governu, prokuradór jerál repúblika ho komandante jerál PNTL tanba laiha ema ida aas liu lei, nune’e hein Ministéiru Públiku (MP) no Tribunál atu prosesa.
Deputadu Fretilin, Felix da Costa, husu Ministéiru Públiku atu investiga ema sivíl ne’ebé tau kilat iha uma hodi prosesa tuir lei-ne’ebé iha.
“Asuntu ida horiseik virál loos iha postu Maubara-Loes ne’ebé ema subar kilat, husu atu Ministériu Públika akuza hodi prosesa,” nia hateten.
Deputadu CNRT, Adérito Hugo, apresia mós servisu Polísia Sientífika Investigasaun Kriminál (PCIC, siglá portugés) hamutuk autoridade seguransa no servisu intelijénsia hotu konsege deskobre liga ho arma ne’ebé kontra bandu ema sívil rai kilat.
“Agora prosesu tuir mai, kona-ba andamentu ba aktu pesoal ne’e nian ita hein prosesu tomak, tanba deskobre hosi autór justisa sira intelejénsia, agora ita hein prosesu akuzasaun ba Ministéiru Públiku sei halo ne’ebé ita hein ninia finál saida, no movitu saida mak indivídu sívil ida konforme antes ne’e iha kargu saida-saida, maibé agora hanesan ema sívil ida rai hela sasán arma kontra bandu,” nia hateten.
Hatán kona-ba, karik iha regra ruma eis komandante jerál PNTL bele iha pose uza arma, nia hatán, hanoin autór justisa sira envolve mós prosesu ne’e bele iha regra ba ida-ne’e ka lae, tan ne’e iha direitu ruma ba pose arma ne’e buat ketak ida.
“Maibé haree ba aktu ne’ebé halo, pesoál rai arma ne’e ho maneira rai ho espasu ida subar, se direitu uza arma tenke rai iha fatin ne’ebé la’ós atu subar,” nia dehan.
Jornalista : Nelson de Sousa
Editór : Cancio Ximenes
