DILI, 17 janeiru 2023 (TATOLI) – Diretór Jerál Servisu Koorporativu, Ministériu Saúde (MS), Marcelo Amaral, informa, MS kontinua kontratu profisionál saúde hamutuk 1.042 hodi presta servisu ba kazu Covid-19 iha Timor-Leste.
”Ami durante ne’e la´os hapara sira maibé ita avalia atu nune’e sira ne’ebé mak nesesita loloos, entaun sira ne’e kontinua nafatin servisu ida ne’e”, Diretór Jerál Servisu Koorporativu Ministériu Saúde, Marcelo Amaral, ba TATOLI iha HNGV.
Nia esplika, profisionál saúde sira ne’e kontinua nafatin presta servisu tanba izolamentu no ICU ne’ebé mak MS konstrui ona, ida ne´e fatin ba sira hodi bele halo servisu ba ida ne’e.
”Sira mós eduka nafatin ita-nia populasaun sira atu vasina no tuir notísia mundiál Covid sa’e iha nasaun China, America, entaun ameasa sei iha nafatin, entaun ho sira-nia servisu ajuda MS ho di´ak liutan.Tanba ne’e mak ita preparadu, se aban bainrua mak mosu mai ita la preparadu n’e kazu aumenta ho ida ne’e mak sira kontinua nafatin halao servisu”, nia informa.
Totál pesoál, saúde ne’ebé kontradu ba Covid-19 ho fundu Covid-19 tinan 2023 tuir munisípiu, ospitál sira no diresaun sira mak hanesan Munisípiu Manufahi ho pesoál saúde na’in neen, Aileu na’in neen, Ainaro ualu, Baucau 13, Bobonaro 57, Covalima 54, Dili 264, Ermera 17, Lautem ida, Liquiça ida, Manatuto haat, Manufahi ida,Viqueuqe 19, no RAEOA neen.
Hospitál Nasionál Guido Valadares (HNGV) hamutuk 366, Horex Baucau 12, Hospitál Referál Maliana 11, Hospitál Referál Suai sia no ospitál referál Maubesi lima.
Diresaun Jerál Prestasaun Saúde (DGPS) na’in lima, Diresaun Jerál Servisu Koorporativu (DGSC) na’in tolu, Diresaun Nasionál Aprovizionamentu (DNA) na’in 12, Diresaun Nasionál Administrasaun Lojístika no Patrimóniu (DNALP) hamutuk 31, Diresaun Nasionál Apoiu Servisu Hospitalar (DNASH) rua, Diresaun Nasionál Orsamentu Jestaun no Finansa (NNOJF) lima, Diresaun Nasionál Rekursu Umanus (DNRH) sia, Diresaun Nasionál Saúde na Famúlia (DNSnF) haat, Diresaun Nasionál Saúde Públika(DNSP) 63, Gabinete Lisensiamentu Rejistu Atividade Saúde (GLRAS) tolu, Gabinete Planu Polútika Kooperasaun Saúde(GPPCS) rua, no Gabinete Garantia Kualidade Saúde(GQQS) na’in neen.
Entretantu, MS prevee millaun $18,312,599 ba fundu Covid-19 iha Orsamentu Jerál Estadu 2023 (OJE).
Jornalista : Felicidade Ximenes
Editór : Zezito Silva
