Okupa rai no uma Estadu obrigatoriu selu arendamentu

DILI, 17 janeiru 2023 (TATOLI) – Ministru Justisa (MJ), Tiago Amaral Sarmento, informa ba sidadaun sira ne’ebé okupa rai no uma Estadu, iha tempu besik sei halo identifikasaun, nune’e bele selu arendamentu ba Estadu, tantu nasionál no munisipál.
“Bazea ba orientasaun hosi Ministériu Justisa nian ba Diresaun Terras Propridade atu identifika uluk, halo levantamentu uma no rai ne’ebé pretense ba Estadu, husu ba diretór terras hotu iha nasionál no munisípiu atu book-aan hamutuk, koordena ho instituisaun seluk atu identifika rai no uma Estadu sira ne’e hodi regulariza”, ministru dehan ba jornalista sira iha Palásiu Governu, hafoin remata reuniaun ho Xefe Governu, ohin.
Nia dehan MJ prepara ona presu arenda, entaun tabela atu sidadaun hotu selu tuir valór ne’ebé sei fó sai iha tempu besik no arendamentu sei halao mós iha fulan rua no tolu oin mai.
Tempu besik MJ sei halo mós sosializasaun iha territóriu nasionál hotu kordena ho veteranu hotu kada munisípiu, liña ministeriál balun atu nune’e MJ nia tékniku sira tun halo knaar iha terenu labele mosu problema ou intervensaun ruma.
“Rai sira ne’e balu pretense ba komunitáriu nian, rai kultura ami mós tau prioridade ba veteranu faluk oan kiak, entaun ami sei halo uluk dizeminasaun informasaun molok halo levantamentu sira ne’e”, relata nia.
Tuir nia iha territóriu nasionál ema hamutuk rihun-lima mak selu ona arendamentu ba uma no rai Estadu.
“Iha munisípiu hotu iha Timor laran tomak ema hamutuk rihun lima mak selu arendamentu ba uma no rai estadu, tinan kotuk 2022 hahú janeiru-dezembru Diresaun Terras hatama reseita millaun $4, osan sira ne’e hosi populasaun sira selu arendamentu mak ne’e,” nia informa.
Jornalista:Hortencio Sanchez
Editór : Zezito Silva

