PCIC detein eis-ministru Longuinhos Monteiro tanba deskonfia rai arma fogu iha rezidénsia
DILI, 17 janeiru 2023 (TATOLI)— Polísia Siéntifika Investigasaun Kriminál (PCIC,sigla portugés), detein eis-ministru Interiór no eis- Komandante Polísia Nasionál Timor-Leste (PNTL), Longuinhos Monteiro tanba deskonfia envolve kazu asegura arma fogu ilegal iha nia-rezidénsia.
Hafoin iha prosesu identifikasaun, PCIC deteta ka komprova katak iha faktu duni eis-Komisáriu Polísia ne’e asegura arma ilegál iha nia-rezidénsia. Tanba ne’e, daudaun eis-ministru Interiór Longuinhos Monteiro iha sela detensaun PCIC Caicoli, hahú iha loron segunda (16/01), hodi hein kompleta oras 72 atu submete ba primeiru interogatóriu iha Tribunál Distritál Dili.
Notísia relevante: Komisáriu Faustino: Lei la autoriza ema sivíl rai arma iha uma
Tuir Investigadór Polisia Siéntifika Investigasaun Kriminál (PCIC, sigla portugés), Floriano Serano, hateten, PCIC suspeita eis Minisrtru Interiór, Longuinhos Monteiro ba kazu arma proíbidu iha nia rezidénsia Liquica, hafoin submete ba prosesu identifikasaun iha edifisiu PCIC.
“Tanba faktu sira ne’ebé maka PCIC rekolla iha nia rezidénsia ne’e iha indísiu ba krime arma proíbidu ne’ebé previstu iha artigu 211 hosi kodigu penál Timor-Leste, ne’ebé altera ona ba lei númeru 5/2017, kona-ba arte marsiál no arma branka”, Investigadór PCIC ne’e hateten ba jornalista sira iha edifísiu PCIC, tersa ne’e.
Tanba, nia dehan hafoin PCIC halo tiha identifikasaun ba suspeitu no analiza tiha faktu sira ne’e, husu autorizasaun ba Ministériu Públiku hodi halo detensaun fragante delito ba suspeitu tanba nia aktus ne’ebé nia komete ne’e prenxe rekezitu krime.
“Horsehik kedan ita detein suspeitu durante oras 72 hodi submete ba prosesu primeiru interrogatóriu iha Tribunál Distritál Dili”, nia informa.
PCIC mós arrola ona faktu hosi suspeitu ba Ministériu Públiku hanesan na’in ba asaun penál atu halo promove ka halo akuzasaun ba suspeitu atu bele submete ba Primeiru Interrogatóriu dahuluk iha Tribunál Distritál Dili , kuarta (18/01), aban.
“Faktu sira ne’ebé maka PCIC hamutuk ho ekipa konjunta halo buska iha suspeitu nian rezidénsia sei valida iha Tribunál”, katak nia.
Iha loron segunda (16/1) dadeer, ekipa konjunta kompostu hosi Polísia Sientifika Investigasaun Kriminál (PCIC, sigla portugés), Serbisu Informasaun Polísia (SIP), Servisu Informasaun FALINTIL-Forsa Defeza Timor-Leste no Servisu Nasionál Intelejénsia (SNI) halo apreensaun buska domisiliáriu ba rezidénsia área Loes, postu administrativu Bazartete, muisípiu Liquica tanba ekipa konjunta detata eis-Komisáriu PNTL ne’e asegura hela sasan hanesan kilat boot tolu, pistola ida, rama automátika ho monisaun ba kilat J3, M16 no pistola glock19.
Jornalista: Natalino Costa
Editór : Florencio Miranda Ximenes
