Top

PLP sei realiza kongresu iha fevereiru

Deputadu PLP, Francisco Vasconcelos. Imajen Tatoli/Francisco Sony

DILI, 17 janeiru 2023 (TATOLI)—Vise Prezidente Konsellu Polítika Nasionál (KPN), Partidu Libertasaun Populár (PLP), Francisco de Vasconcelos, informa PLP sei realiza ninia kongresu iha fulan-fevereiru tinan ne’e hodi hasoru eleisaun parlamentár 2023.

“PLP ninia preparasaun lao kle’ur ona hanesan konsolidasaun, reajustamentu, atividade partidu la’o nafatin. Ne’ebé semana oin (fulan janeiru nia laran) sei hala’o konferénsia munisipál, depois ne’e iha kongresu iha fevereiru nianlaran hodi prepara ba eleisaun parlamentár, ne’ebé ami preparadu hodi hein de’it Prezidente Repúblika dekreta kalendáriu eleisaun parlamentár,” Vise Prezidente KPN ne’e hateten ba Ajénsia Tatoli iha Parlamentu Nasionál, tersa ne’e.

Maske nune’e, nia seidauk fó data fiksu ba loron kongresu nian maibé partidu sei hala’o iha fevereiru nia laran.

Tuir ajenda, nia dehan, kongresu ne’e sei ko’alia kona-ba estrutura, estatéjia hasoru eleisaun parlamentár, programa eleitorál ho sira seluk tan ne’ebé sei partisipa hosi estrutura mai hosi munisípiu iha territóriu nasionál.

Kona-ba atu hili foun lideransa partidu nian tanba lideransa partidu mandatu atuál termina, nia dehan, ida-ne’e depende ba kongresista sira mak haree.

“Estrutura partidu baibain de’it bele to’o tinan lima ka 10, depende kongresista sira mak hili ne’ebé liuhosi dalan demokrásia ne’e hahú kedas iha partidu,” nia dehan.

Tuir lei númeru 2/2016 obriga partidu polítiku sira-ne’ebé rejistadu tenke realiza kongresu nasionál ka konferénsia, nune’e bele kompete iha eleisaun parlamentár 2023.

Lei númeru 2/2016, 3 fevereiru (Lei partidu polítiku) artigu 19 (Kongresu no Konferénsia Nasionál partidu sira) númeru 1 hateten, partidu polítiku sira bele kria órgaun ne’ebé julga nesesáriu ba prosekusaun objetivu, pelumenus, órgaun sentrál reprezentativu ida, ho funsaun deliberativa.

Iha númeru 2 hatutan, Kongresu ka Konferénsia Nasionál partidu nian ne’e aas liu órgaun deliberativu nivél nasionál, pelumenus dois terços hosi delegadu sira-ne’ebé diretamente eleitu hosi respetivu sírkulu partidáriu, asegura ho partisipasaun no reprezentatividade hosi baze.

Nune’e mós iha númeru 3 hateten, Kongresu ka Konferénsia Nasionál iha kompeténsia eskluziva ne’ebé prosede ba aprovasaun estatutu no programa polítiku.

Iha númeru 4 hosi artigu 19 ne’e dehan, Kongresu ka Konferénsia partidu nian tenke halo másimu tinan haat (4) dala-ida.

Jornalista : Nelson de Sousa

Editór       : Cancio Ximenes

Publisidade

Leave a Reply

Latest Post

error: Content is protected !!