RAEOA-BP3 Curug selebra akordu kooperasaun iha área téknika aviasaun akadémika
JAKARTA, 16 janeiru 2023 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, segunda ne’e selebra akordu ho Balai Pusat Pendidikan dan Pelatihan Penerbangan Curug (BP3 Curug), Ahmad Hapipi, kona-bá formasaun téknika aviasaun no akadémika voo.
Serimónia akordu realiza iha sentru formasaun no formasaun voo Curug Tangeran, Jakarta, Repúblika Indonézia no hetan akompaña direita hosi Sekretáriu hosi Ajénsia ba Dezenvolvimentu Rekursu Umanu hosi Ministériu Transporte Repúblika Indonésia no diretór aeroportu Rota do Sândalo Oé-Cusse, João Lima Tavares.
“Ohin ha’u asina akordu ida fó dalan ba Oé-Cusse atu kontinua haruka ita-nia funsionáriu sira bele mai aprende, iha área seluk hanesan téknika aviasaun, akadémia voo, ohin sira-nia ulun boot iha-ne’e mós hatete, fasilita formasaun gratuita, ha’u kontente ita hatudu katak, ita sériu buka matenek, halo negosiasaun no diskusaun, sira simu ita ho di’ak,” Arsénio Bano, informa ba Agência Tatoli iha Jakarta.
Nu’udar Prezidente Autoridade RAEOA, hakarak rekursu umanu iha Oé-Cusse, presiza hasa’e beibeik kualidade liuhosi formasaun oioin.
“Foin daudaun eletrisidade sira hosi sentrál Power Plant Inur Sakato, no faze tuir mai mak agora aeroportu sira, no sei mai tán hosi sira seluk, tanba ha’u hakarak Oé-Cusse ne’e iha área hotu-hotu nia rekursu ne’e aumentadu ho kualidade liu-liu sira-ne’ebé servisu iha setór públika,” nia afirma.
Iha fatin hanesan, Kepala Balai BP3 Curug, Ahmad Hapipi, informa, serbisu hamutuk liuhosi kooperasaun entre Balai BP3 ho RAEOA Timor-Leste, hanesan kontinuasaun.
“Akordu ida-ne’e atu hametin liutaá ita-nia relasaun kooperasaun, serbisu hamutuk entre Timor-Leste ho Indonézia, fokuliu ba kapasitasaun rekursu umanu ba área aeroportu nian, tanba antes ne’e iha 2019 ita selebra ona akordu maibé ein-jerál liu, tán ne’e maka ohin ita implementa daudaun, maibé akordu ida agora ba futuru ita sei fokuliu ba téknika aviasaun no formasaun nian,” nia katak.
Jornalista : Abílio Elo Nini
Editór : Evaristo Soares Martins
