BAUCAU, 18 janeiru 2023 (TATOLI) – Autoridade suku Buruma, postu administrativu Baucau Vila rejeita informasaun impede subsídiu $200 ba komunidade suku refere.
Xefe suku Buruma, Libório dos Santos Freitas, rekoñese iha uma-kain hamutuk 54 mak la simu subsídiu tanba la prienxe rekizitu hanesan naran dupla, agregadu familiár laiha tanba óbitu no saláriu liu $ 500 inklui iha membru família uma-kain ida mak laiha dokumentu tanba idade seiduak to’o.
“Sira bele iha direitu maibé admistrativamente la prienxe kritéria tuir orientasaun hosi ministériu no orsamentu ita devolve hikas ba banku,” Xefi suku hateten iha Buruma, kuarta ne’e.
Uma-kain 54 refere maihosi aldeia Casmutu 15, Ono-sere 17, Suli-ua 19 no Tasi hamutuk 3 ne’ebé autoridade suku kontinua submete lista reklamante hamutuk benefisiáriu uma-kain 19 ba parte kompetente hodi prosesa subsídiu $200.
Libório Freitas esplika, orsamentu transfere iha konta bankária suku nune’e bainhira prosesu pagamentu direitamente hala’o hosi tékniku Ministériu Solidaridade Sosial no Inkluzaun (MSSI) no akompaña hosi autoridade suku.
Dadus hosi benefisiáriu bazea ba lista subsídiu Covid-19 tinan 2021 nune’e naran komunidade balun ne’ebé antes ne’e la simu kontinua la simu iha subsídiu $200.
“Pagamentu só ba benefisiáriu ne’ebé naran aprovadu hosi MSSI, ita laiha direitu atu kansela nune’e ami bazea ba orientasaun ne’ebé fó hosi ministériu,” Libório Freitas akresenta.
Autoridade suku Buruma lamenta ho deklarasaun deputada Helena Martins Belo liuhosi plenária parlamentu nasionál iha loron segunda, 16 janeiru ne’ebé hateten xefe suku halo impedimentu ba komunidade balun hodi kansela simu subsídiu fim do ano $200.
Libório Freitas rejeita informasaun refere tanba laiha verifisaun direitamente iha baze kona-bá prosesu no lala’ok pagamentu subsídiu $200 ba komunidade.
Nu’udar autoridade suku prontu simu krítika maibé inportante bazea ba faktu nune’e labele husik hela dúvida tanba iha inpaktu pensamentu negativamente ba komunidade.
“Hau la sastifaz ho deklarasaun hosi distinta deputada balun tanba laiha konfirmasaun direita mai baze,” Libório Freitas argumenta.
Totál benefisiáriu subsídiu fim do ano iha suku Buruma hamutuk 796 komposta hosi aldeia haat hanesan Casmutu 149, Ono-sere 259, Suli-ua 302 no Tasi 89, ho totál orsamentu hamutuk $159.200 no devolve fali osan ba banku hamutuk $10.800 hosi totál orsamentu transferénsia hamutuk $170.000
Jornalista : Natalino Belo
Editór : Evaristo Soares Martins
