Estudante na’in-281 iha Viqueque asesu ba bolsa méritu
VIQUEQUE, 18 janeiru 2023 (TATOLI)—Diretór Serbisu Edukasaun munisípiu Viqueque, Dominigos Brandão, informa submete ona lista estudante na’in-281, ne’ebé hetan valór di’ak hodi asesu bolsa méritu ba Diresaun Jerál Nasionál Ensinu no Edukasuan iha Ministériu Edukasuan Juventude no Desportu (MEJD).
Estudante ne’ebé asesu bolsa méritu, kompostu hosi ensinu primaria to’o tékniku vokasionál na’in-145 no estudante finalista na’in-136.
“Lista estudante bolsa meritu hosi munisípiu Viqueque nian ami entre ona ba nasionál no nasionál entrega fali munisípiu hodi orienta estudante ne’ebé hetan bolsa méritu loke sira-nia konta bankária”, hateten Domingos Brandão, ba jornalista sira, iha ninia kna’ar fatin, Beloi, kuarta ne’e.
Daudaun ne’e, Estudante ho prestasaun di’ak hahú loke ona konta bankaria iha Banku Nasionál Komérsiu Timor-Leste (BNCTL-sigla portugés).
“Estudante sira bele entraga fali ba Edukasaun munisípiu Viqueque hodi entrega ba MEJD atu transfere subsídiu bolsa méritu ne’e”, katak.
Tuir dadus estudante bolsa méritu na’in-1.132, maibé, tama ba validasaun ba bosla méritu la to’o. Tan ne’e maka orsamentu aloka mai munisípiu Viqueque $635,900.00 hodi selu ba estudante sira.
“Bolsa méritu motiva tebes ba estudante sira atu estuda tanba realidade hatudu estudante finalista hosi munisípiu Viqueque pasa 100% ida-ne’e pasu ida di’ak ba estudante sira,”
Jornalista: Vitorino Lopes da Costa
Editór : Florencio Miranda Ximenes
