DILI, 18 janeiru 2023 (TATOLI) – Governu liuhusi Konsellu Ministru aprova alterasaun daruak ba Dekretu-Lei n.o 3/2019, loron 5 fulan-marsu nian, ne’ebé aprova orgánika Ministériu Saúde.
Ministru Prezidénsia Konsellu Ministru, Fidelis Manuel Leite Magalhães, hatete projetu dekretu-lei ne’e aprezenta husi Ministra Saúde (MS), Odete Maria Freitas Belo.
“Alterasaun ida-ne’e ninia objetivu mak atu ajusta orgánika ministériu ne’e nian ho alterasaun sira ne’ebé mosu ho kriasaun Institutu Nasionál Saúde Públika nian, hodi armoniza no integra, ho forma hanesan, kompeténsia sira kona-ba planeamentu, monitorizasaun no avaliasaun saúde nian ne’ebé atribui ona ba Gabinete Polítika, Planeamentu no Kooperasaun iha Saúde, nune’e mós kompeténsia sira kona-ba kontrolu kualidade servisu saúde nian sira ne’ebé integra iha Gabinete Kualidade iha Saúde”, ministru hateten, iha Palásiu Governu.
Ho alterasaun ne’e, prevee mós kriasaun Diresaun Nasionál Nutrisaun no Unidade Jestaun Projetu.
“Ne’e hanesan alterasaun ba orgánika de’it hodi Ministériu Saúde bele funsiona di’ak liután, liuliu harii unidade sira hodi ajuda halo koordenasaun ba projetu hirak ne’ebé ministeriu hakarak atu halo, hanesan konstrusaun ba iha ospitál, hadi’ak liután laboratóriu nasionál. Tanba nesesidade hirak ne’e mak presiza atu halo ajustamentu ba iha orgánika ministériu nian”, nia esklarese.
Jornalista: Antónia Gusmão
Editora: Maria Auxiliadora
