Konstrusaun estrada Tasi-Tolu iha tempu badak sei remata

DILI, 18 janeiru 2023 (TATOLI)— Ministru Obra Públika (MOP), Abel Pires da Silva, hateten, konstrusaun estrada iha Raikotu ba Tasi-Tolu, Dili iha tempu badak sei remata.

Membru Governu ne’e dehan, konstrusaun estrada tasi-tolu besik remata ona. Tanba agora hein kompleta tan bee-dalan hosi parte foho ba tasi, tanba parte bee-dalan foho nian hotu ona agora kompañia haree fali ba bee-dalan tasi nian. Kuandu rua ne’e hotu ona mak, sei tau aspal no tau tan trotoár.

“Bainhira bee-dalan ne’e hotu ona chor ka fui semente ne’e hein loron to’o 28 mak foin metin. Ne’ebé ha’u hanoin fulan ida tan hanesan ne’e konstrusaun estrada refere hotu ona,” Abel Pires da Silva hateten iha Palásiu Governu Dili, kuarta ne’e.

Konstrusaun estrada Tasi tolu ne’e rasik kaer hosi kompañia Jonize Unipessoál Lda. Obra refere bazeia ba pedidu projetu emerjénsia Road Upgrading Project Dili, (Raikotu) Tasi-Tolu, (Road link A 03-01), Stasaun 8-000 – Stasaun 8+743.246 ne’ebé MOP aprezenta iha loron 31 marsu liubá iha KAFI.

Enkuantu kona-ba estrada hosi rotunda Nicolau Lobato, Komoro ba Raikotu, Dili nia dezeñu iha ona, maibé problema oituan iha prosesu   imprentasaun.

“Tanba atu imprementa ne’e Ministériu Finansa mantein ida konstrusaun ne’e rasik hakarak tama ba fundu impréstimu ne’ebé sei iha prosesu hela, maibé di’ak hela tanba estrada ligasaun hosi Rotunda ba Raikotu ne’e sei di’ak hele ne’ebé ita uza lai,” nia dehan.

Nune’e kona-ba, problema eskola São Miguel ne’ebé daudaun ne’e seidauk sai hosi fatin Raikotu, Governu iha akordu ida ho sira hodi  fó rai ba sira. Agora Governu indetifika rai iha parte Aldeia Seroja nian, maibé ida ne’e sei iha prosesu nia-laran tanba komunidade hela iha área refere mós ladun konkorda.

“Maibé aprosimasaun ita kontinua la’o hela, ne’ebé kleur ka tarde ita sei iha rezultadu. Ita sei halo kontrusaun estrada ne’e,” Abel dehan.

Jornalista : Arminda Fonseca

Editora : Armandina Moniz