DILI, 18 janeiru 2023 (TATOLI)—Membru Parlamentu Nasionál (PN) husu Governu atu kontrola loza xineza sira iha kapitál Dili ne’ebé halo imitasaun ba padraun ka dezeñu tais Timor-Leste hodi faan iha sira-nia loja.
Notísia Relevante: PN aprova votu kongratulasaun ba “tais” sai patrimóniu mundiál
“Ida-ne’e kompeténsia Governu nian, tenke haree oinsá prevene xineza sira labele kópia ka labele halo imitasaun ba padran ka dezeñu tais Timor nian, atu tama fali ba sira-nia fábrika,” Deputadu Fretilin, Felix da Costa, hateten ba Agênsia Tatoli iha PN, kuarta ne’e.
Reprezentante povu ne’e preokupa ho loza xineza sira-ne’ebé daudaun ne’e faan tais hodi imita dezeñu tais tuir orijinalidade Timor-Leste nian.
“Nasaun seluk uza ita nia orijinalidade, ne’e ita-nia riku soin padraun immaterial atu sai fali ba sira-nian. Ida-ne’e bele ameasa halakon orijen rasik, entaun ita iha lei kódigu autór atu regula ahalok sira hanesan ne’e,” nia hateten.
Notísia Relevante: PN aprova projetu rezolusaun “Loron Nasionál Tais” selebra kada 14 dezembru
Deputadu CNRT, Patrocínio Fernandes, hateten ita tama iha sistema merkadu livre nune’e hasoru situasaun sira hanesan ne’e, entaun ezije timoroan sira-nia kreatividade no kapasidade oinsá compete atu compete iha merkadu.
“Agora ita iha ona rejime kódigu direitu autór nian, sira ne’e hotu liga ba ne’eba kabe ba Governu interpreta lei ne’e tau iha implementasaun. Se sira konsege kópia ka imita padraun ka dezeñu Timor-Leste ninia tais orijinalidade ne’e Governu tenke haree ida-ne’e,” nia dehan.
Notísia Relevante: 16 Dezembru, UNESCO sei anunsia “Tais” sai Patrimóniu Kulturál-Immateriál mundiál
Jornalista : Nelson de Sousa
Editór : Cancio Ximenes
