DILI, 18 janeiru 2023 (TATOLI)– Governu autoriza Ministru Finansa, Rui Gomes, atu asina akordu kontribuisaun finanseira direta ho montante millaun $14 ho Governu Austrália.
Selebrasaun akordu ne’e hodi apoiu reziliénsia komunitária no rekuperasaun ekonómika iha Timor-Leste durante pandemia globál COVID-19 Faze da-3.
“Tuir akordu ida ne’e, Governu Austrália hakarak realiza kontribuisaun finanseira direta foun ba Timor-Leste, ho valór to’o dolar australianu millaun 20 ka besik millaun $14, hodi apoia komunidade no hadi’a ninia infraestrutura sira liuhusi Programa Nasionál Dezenvolvimentu ba Suku (PNDS), subsídiu ‘Bolsa da Mãe-Nova Geração, no apoia mobilidade laborál”, Ministru Prezidénsia Konsellu Ministru, Fidelis Magalhães, hateten, iha Palásiu Governu.
Akordu ne’e prevee katak PNDS sei implementa iha suku 452 no aloka mós subsídiu ‘Bolsa da Mãe-Nova Geração’, sei haluan ba munisípiu seluk aléinde munisípiu sira ne’ebé daudaun ne’e prevee ona, nomós katak programa Mobilidade Laborál sei implementa iha Dili.
Jornalista: Antónia Gusmão.
Editora: Maria Auxiliadora
