DILI, 18 janeiru 2023 (TATOLI) – Servisu Saúde Munisípiu Dili (SSMD), rejista kazu dengue hamutuk 17 husi postu administrativu lima iha Munisípiu Dili.
“Servisu Saúde Munisípiu Dili relata iha semana dahuluk bainhira ita tama iha 27 dezembru to´o agora ita iha kazu dengue hamutuk 17 iha Munisípiu Dili”, Diretora Servisu Saúde Munisípiu Dili, Agostinha Segurado, informa ba jornalista sira iha Timor Plaza, ohin.
Husi númeru ne’e mane na’in 10, feto hitu, husi idade tinan ida to´o haat hamutuk na’in lima, husi tinan lima to´o 14 hamutuk na’in neen, husi idade 15 to´o 24 hamtutuk na’in lima, husi idade 25 to´o 49 iha na’in ida, maibé sira ne’e rekopera hotu.
“Área risku ne’ebé identifika kazu makas mak husi Postu Administrativu Dom Aleixo, Cristo Rei, Vera kruz, Nain Feto no Metinaro”, afirma nia.
Kona-ba intervensaun SSMD halo nafatin liuliu husi ekipa edukasaun saúde no mos halo distribuisaun kímiku abate iha komunidade atu hamate susuk tolu sira ne’ebé mak iha.
“Depois ita mós hatene ona, sira ne’ebé mak hetan ona dengue ba halo fomigasaun direta tanba stock ba intervensaun ita la iha problema, agora daudaun ita sufisiente hodi bele halo prevensaun”, esplika nia.
“Ita koloka ema ida-idak bele responsabiliza suku ida hodi haree liuba área ne’ebé mak ita haree husi relatóriu vijilánsia epidemolojia nian katak área ida ne’e risku, entaun sira tun halo distribuisaun abate”, konklui nia.
Jornalista : Felicidade Ximenes
Editór : Zezito Silva
