BOBONARO, 18 janeiru 2023 (TATOLI) – Sekretariadu Tékniku Administrasaun Eleitorál (STAE), Munisípiu Bobonaro planeia aumenta tán sentru votasaun 17 hodi prepara ba eleisaun parlamentár tinan 2023.
Diretór STAE Munisípiu Bobonaro, Mariano Viegas Amarál, subliña planu aumenta sentru votasaun ne’e bazea ba nesesidade duni, tanba iha tinan kotuk eleisaun prezidensiál komunidade sira barak mak hela dook hosi sentru votasaun.
Notísia relevante: STAE Bobonaro identifika sentru votasaun 40 seidauk asesu eletrisidade
“Ita iha sentru votasaun iha eleisaun prezidente tinan kotuk iha sentru votasaun 130, maibé eleisaun parlamentár aumenta tán 17. Agora hamutuk 147 sentru votasaun ho nia estasaun votu hamutuk 167 ne’ebé mak ita prepara ba eleisaun parlamentár,” nia informa ba jornalista sira, iha kna’ar-fatin, Maliana, kuarta ne’e.
Sentru votasaun ne’e ida iha sede aldeia foun Miguir, postu administrativu Atabae, iha postu administrativu Bobonaro neen mak hanesan iha suku Leber rua, Molop ida, Ai-Asa ida.
Ba postu administrativu Cailaco iha área Bili-Mau, postu administrativu Lolotoe hamutuk tolu, ida iha sentru Ensinu Báziku Sentrál (EBC) suku Guda-Taz, no iha suku Lontas, aldeia Piron, no ba postu administrativu Balibó aldeia Badut-Mean, suku Cowa ne’ebé fronteira ho Silwan, Atambua, Indonézia.
Enkuantu iha postu administrativu Maliana aumenta lima mak hanesan iha suku Ritabou sentru votasaun rua (Halekou no Mole-Anan), suku Holsa iha rua, ida iha Ensinu Báziku Filiál (EBF) Oplegul no ida iha Dom Bosco, aldeia Lolo-oa no ida iha suku Odomau, aldeia Tokon.
“Tempu besik kuandu aprovadu iha diresaun jerál, ita sei fó-sai ba postu no suku hotu-hotu, atu nune’e ita-nia administradór postu no nai liurai sira bele hatene sentru votasaun hira iha sira-nia suku no sentru votasaun hira iha sira-nia postu,” nia katak.
Enkuantu tuir dadus hosi STAE munisípiu Bobonaro iha tinan 2022, iha sentru votasaun 130 no estasaun votu 150. Númeru ne’e komposta hosi postu administrativu Atabae iha sentru votasaun 13 no estasaun votu 15, Balibo iha sentru votasaun 20 no estasaun votu 24.
Iha postu administrativu Bobonaro iha sentru votasaun 40 ho estasaun votu 44, Cailaco sentru votasaun 15 no estasaun votu 16. Iha parte postu administrativu Lolotoe iha sentru votasaun 15 no estasaun votu 15 no iha postu administrativu Maliana iha sentru votasaun 28 no estasaun votu 36.
Notisia relevante: Eleitór Bobonaro 24% la tuir votasaun iha volta daruak
Jornalista : Sérgio da Cruz
Editór : Evaristo Soares Martins
