UKL faze dahuluk suku Buruma besik finaliza
BAUCAU, 17 janeiru 2023 (TATOLI) – Progresu konstrusaun Uma Kbiit La’ek (UKL) faze dahuluk tinan-2022 liuhosi Programa Nasionál Dezenvolvementu Suku (PNDS) iha suku Buruma, postu administrativu Baucau Vila tama ona ba faze finalizasaun antes entrega ba benefisiáriu.
Xefe suku Buruma, Libório dos Santos Freitas, esplika, faze dahuluk ba implementasaun programa refere iha benefisiáriu uma-kain tolu hosi aldeia Casmutu, ne’ebé konstrusaun fíziku finaliza ona no hein kompleta tán asesoria balun nune’e tempu badak sei entrega ba benefisiáriu.
“Tuir observasaun hosi tékniku sira dehan asesoria balu hanesan hadi’a eskada presiza kompleta antes entrega ba benefisiáriu,” Xefi suku Buruma hateten iha sede suku Buruma, kuarta ne’e.
Maske nune’e jeralmente uma nia fíziku finaliza ona maibé tanba tuir observasaun tékniku hosi PNDS uma tolu refere iha item balun ne’ebé presiza kompleta hosi ekipa implementadór.
Autoridade suku liuhosi reuniaun konsellu suku deside no husu ekipa implementadór sira atu aselera hodi hadi’a item sira-ne’ebé presiza atu kompleta.
Uma tolu refere ho medida metru² 48 kompostu kuartu tolu, sala bainaka, kuziña no dapur ne’ebé kada uma aloka orsamentu hamutuk $17.000 hosi totál rihun $51-resin.
Jornalista : Natalino Belo
Editór : Evaristo Soares Martins
