VIQUEQUE, 19 janeiru 2023 (TATOLI)- Autoridade munisípiu Viqueque liuhosi Diresaun servisu finansa munisipál, kinta ne’e, realiza sosializasaun kona-ba ezekusaun Orsamentu Jerál Estadu (OJE) 2023.
Biban ne’e, Administradór munisípiu Viqueque, Januario Soares “Bolly”, hateten objetivu husi sosializasaun ne’e hodi sosializa OJE 2023 ne’ebé aloka mai munisípiu Viqueque atu diresaun ida-idak no postu administrativu sira bele hatene ninia orsamentu no halo halo planu ezekusaun tuir programa.
“Tanba orsamentu OJE 2023 iha ona, nune’e kada diresaun sira bele halo ona sira nia pedidu ezekutsaun ba orsamentu ne’ebé aloka hosi Governu mai munisípiu tanba ne’e maka bolu diresaun sira no adiministradór postu sira”, Administradór ne’e hateten ba jornalista sira iha salaun adiministasaun, kinta ne’e.
Nune’e, Auotridade munisípál Viqueque ne’e husu diresaun munisípiu no administradór postu sira tenke jere orsamentu tuir programa ne’ebé kada direasaun no postu sira planeia ona iha OJE 2023.
Iha fatin hanesan, Diretór Servisu Finansa munisipál, Vansco Nunes, afirma Ministériu Finansa hahú distribui pakote OJE 2023 iha loron 05 janeiru 2023.
“Bainhira Ministériu Finansa halo ona lansamentu, iha loron 05 janeiru ne’e fó ona kompeténsia ba kada munisípiu atu ezekuta. Maske ita la’o tarde oituan tanba tempu, maibé parte finansa foin maka fahe inforsamasaun ba servisu munisípal no adiministradór postu sira atubele halo pedidu pagamentu ba atividade sira-ne’ebé planeia ona iha 2023”, nia afirma.
Alokasaun OJE 2023 ba munisípiu Viqueque totál hsmutuk tokon $6.925.794. Husi totál orsamentu hodi asegura dezenvolvimentu rurál liu husi konstrusaun estrada no ponte, eskola, postu saúde, postu adiministrativu no sede suku sira, saneamentu no atividade sosiál inkluzaun sira, inklui atividade programa mão-de-obra postu adiministrativu (PMOPA), programa dezenvolvimentu integradu munisípiu(PDIM) no atividade desportiva.
Tuir alokasaun ba kada diresaun sira iha munisípiu Viqueque ba estrada no ponte aloka $103,174.00, dezenvolvimentu rurál no urbanu aloka $1,069,210.00, seguransa nasionál aloka $ 63,959, asesu ba justisa aloka $46,715, boa governasaun no jestaun instituisionál aloka $2,812,210.00, agrikultura aloka $480.120.00, agua saneamentu aloka $102,668.00, saúde aloka $345,799, edukasaun no formasaun aloka $1,799,924.00, igualidade jestaun no inklusaun sosiál aloka $ 60,480.00 no turismu aloka $41.535.
Enkuantu alokasaun ba postu l hamutuk rihun $500 ne’ebé sei aloka ba postu adiministrativu lima no kada postu ida sei hetan $100 hodi benifísia ba program PMOPA.
Iha sosializasaun ne’e, Adiministrasaun Ossu husu ba autoridade munisípiu Viqueque atu apoia rekursu umanu hodi serbisu liga ba finansa iha postu adiministrativu Ossu tanba dadaun rekursu limitadu hodi difikulta servisu finansa nian iha postu.
“Ha’u hakarak husu ba munisípiu, se bele apoiu mós rekursu umanu ba ami tamba ami limitadu iha rekursu, presiza rekursu hodi haree ba finansa liuliu prepara relatóriu sira ba ezekusaun OJE 2023 nia”, katak.
Jornalista: Vitorino Lopes da Costa
Editór : Florencio Miranda Ximenes
