iklan

DILI, HEADLINE, POLÍTIKA

Embaixadora Kanada hasoru lider Xanana Gusmão

Embaixadora Kanada hasoru lider Xanana Gusmão

DILI, 19 janeiru 2023 (TATOLI) – Lider Istóriku, Kay Rala Xanana Gusmão, hala’o enkontru ho Embaixadora Kanada (destakadu iha Indonesia), Nadia Burger, hodi diskute kooperasaun servisu iha área agrikultura, defeza no seluk tan.

“Ami diskute kooperasaun iha área saida mak Kanada atu halo ba Timor-Leste, oinsa mak sira atu ajuda ita nia agrikultura hodi prodúz ai-han barak liután no apoiu seluk tan ne’ebé sira bele oferese no implementa hela iha Baucau, Ermera no Oe-Cusse”, Xanana dehan ba jornalista sira iha edifísiu Sede CNRT, Bairru dos Grilhos, ohin.

Iha enkontru ne’e, eis-Primeiru-Ministru, Xanana ho Embaixadora Nadia Burger diskute mós kooperasaun iha área defeza entre país Indo-Pasífiku.

Tuir Xanana kooperasaun ne’e importante hodi hatudu pozisaun Timor-Leste ba rejiaun Indo-Pasífiku ida ne’ebé nakloke no seguru no prósperu.

“Embaixadora mós ko’alia kona-ba kooperasaun Indo-Pasífiku liga ho servisu Defeza nian, oinsa sira atu ajuda Falintil- Frosa Defeza Timor-Leste (F-FDTL) hodi halo preparasaun ba kontrolu iha tasi, liuliu peska ilegál”, Xanana hateten.

Durante reuniaun, Embaixadora Nadia hato’o kompromisu Governu Kanada nian hodi hametin liután relasaun bilaterál, esplora oportunidade ba kooperasaun mútua iha forúm rejionál no multilaterál inklui ASEAN no mós informasaun kona-ba Kanada nia estratejia foun ba Indo-Pasífiku nian.

Xanana sente orgullu tanba Embaixadora Nadia halo vizita mai Timor-Leste hodi espresa mós sira nia domin ba Timor-Leste liuhosi apoiu ne’ebé depozita ba povu no nasaun Timor-Leste.

Eis-Xefe Estadu, Xanana agradese durante Timor-Leste nia luta ba ukun aan, hetan apoiu hosi povu no nasaun Kanada hodi ajuda Timor-Leste ultrapasa situasaun krítiku.

“Povu Kanada sira nia domin ba Timor-Leste ne’e dezde kedas ita sei luta to´o agora”. Konklui nia.

Jornalista: Hortencio Sanchez

Editór : Zezito Silva

iklan
iklan

Leave a Reply

iklan
error: Content is protected !!