LIQUIÇA, 19 janeiru 2023 (TATOLI)— UNESCO (United Nations Educational, Scientific and Cultural Organization-sigla ingles) liuhusi apoiu finanseiru Governu Japaun entrega Laboratóriu Siénsia no Matemátika sia (9) ba Ministériu Edukasaun Juventude no Desportu (MEJD).
Serimónia inagurasaun no entrega Projetu Reforsa Siénsia no Matemátika iha Timor-Leste ne’e hala’o iha eskola Ensinu Sekundária Jerál Públiku (ESGP) Hu Iso Lara Iso, Liquiça no hetan partisipasaun másimu husi Ministru Edukasaun, Armindo Maia, Embaixadór Japaun iha Timor-Leste, Tetsuya Kimur, Diretúr UNESCO Jakarta, Mohamed Djelid no reprezentante edukasaun munisípiu sia.
Embaixadór Tetsuya Kimura hatete, projetu refere finansia husi povu Japaun ho montante miliaun $2.05 no implementa husi UNESCO. Projetu ida ne’e lansa iha tinan 2019 produs ona materiál ensinu no aprendizajen suplementár iha siénsia no matemátika ba primeiru to’o sestu anu.
“Ida ne’e ami-nia projetu primeiru hodi apoiu siénsia no matemátika ba ensinu báziku ne’ebé bele ajuda estudante foinsa’e sira hodi hetan kuñesimentu báziku ne’ebé sira presiza hodi avansa sira-nia aprendizajen iha ensinu superiór liu-liu iha área enjinária nian,” Tetsuya Kimura dehan iha serimónia inagurasaun Laboratóriu Siénsia no Matemátika ESGP Liquiça, kinta ne’e.
Projetu ne’e oferese treinamentu ba profesóe hodi utiliza materiál hanorin ne’ebé dezenvolve ona, harii laboratóriu iha kada munisípiu no kapasitasaun ba profesór liuhosi fornesimentu formasaun pedagójica.
Parte seluk, MEJD Armindo Maia esplika Laboratoriu Siénsia no Matemátika ne’e importante tebes. Apoiu ida ne’e bele kontribui maka’as ba dezenvolvimentu rai ida nian.
“Iha área ne’e ita TL sei mukit tebes, nune’e agradese ba parseiru sira ne’ebé apoiu ona Governu Timor-Leste hodi oferese fasilita edukasaun ne’ebé diak,” Ministru Armindo dehan.
Governante ne’e husu ba estudante sira atu bele esforsu aan ba estuda atu bele reforsa koñesimentu no kuida fasilidade sira ho di’ak tanba parseiru sira apoiu ona hodi fó formasaun ba professór hotu iha territóriu tomak.
Diretúr UNESCO Jakarta, Mohamed Djelid espera estudante sira bele utiliza fasilidade laboratóriu ho di’ak no bele inspira estudante seluk hodi aprende siénsia no matemátika. UNESCO sei kontinua servisu hamutuk ho MEJD hodi dezenvolve edukasaun Timor-Leste.
“Ha’u fiar ba oin Ministériu Edukasaun sei hola pozisaun hodi kontinua ba projetu laboratóriu ne’e ba eskola seluk ne’ebé seidauk iha fasilidade hanesan,” Diretúr UNESCO Jakarta ne’e rekomenda.
Projetu ne’e estabelese iha munisípiu sira hanesan Ainaro, Baucau, Bobonaro, Covalima, Liquiça, Lautém, Manatuto, Manufahi no Viqueque.
Atu estabelese apoiu, UNESCO mós fasilita ona formasaun ba profesór 1800 no livru sira sei distribui ba munisípiu hotu iha semana ne’e.
Jornalista : Cidalia Fátima
Editor : Armandina Moniz
