Juñu-dezembru 2022, STAE Covalima rejista eleitór foun 843
COVALIMA, 19 janeiru 2023 (TATOLI)–Diretór Sekretariadu Tékniku Administrasaun Eleitorál (STAE) Covalima, Francisco Gusmão, hateten hahú hosi fulan-juñu to’o dezembru tinan 2022 ne’e STAE rejista eleitór foun hamutuk na’in-843.
“Hafoin finaliza eleisaun prezidensiál, ami kontinua hala’o atendimentu ba sidadaun sira hasai kartaun eleitorál (KE) hamutuk na’in-843,” Francisco Gusmão relata ba Agência Tatoli iha Kampung Baru, kinta ne’e.
Tanba ne’e, STAE Covalima dezloka ona ekipamentu resensiamentu eleitorál ba iha postu administrativu neen (6) atu halo atendimentu ba sidadaun-sira ne’ebé hasai kartaun eleitorál iha postu administrativu neen (6) no mós STAE iha Covalima.
STAE sei halo atendimentu ba sidadaun sira atu hasai kartaun eleitorál ba postu administrativu neen iha loron 17 fulan-janeiru ne’ebé sei ramata iha fulan-juñu 2023.
Bazea ba dadus ne’ebé Agência Tatoli asesu hosi STAE, rezultadu resensiamentu eleitorál no atualizasaun baze dadus iha Covalima iha tinan 2022 hamutuk 48,830 ne’ebé kompostu hosi mane na’in-24,950 no feto na’in-23,880.
Hosi númeru totál eleitór hamutuk 48,830 ne’e, eleitór foun hamutuk 843 ne’ebé kompostu hosi feto hamutuk 412 no mane hamutuk 431 ho dadus eleitór atualizadu na’in-1,555 ho mane hamutuk na’in-946 no feto na’in-609.
Jornalista : Celestina Teles
Editór : Cancio Ximenes
