DILI, 18 janeiru 2023 (TATOLI)–Xefe suku Bemori, postu administrativu Nain Feto, munisípiu Dili, Cristalina Pereira, hateten komunidade husu Governu atu aselera programa Cesta Bázika tanba suku seluk simu hotu maibé suku Bemori to’o agora seidauk simu.
“Ami husu Governu liuhosi empreza ne’ebé mak Governu kontrata ne’e husu atu aselera tanba ami-nia komunidade hein to’o seidauk simu no suku sira seluk simu hotu ona tanba sidadaun nia direitu no ida-ne’e programa governu nian,” Xefe suku ne’e hateten Agência Tatoli liuhosi telefónika, kinta ne’e.
Líder komunitária ne’e hateten, komunidade mak mai husu katak bainhira mak fahe Cesta Bázika tanba programa Governu ne’e ema hotu nian maib’e tanbasá mak to’o agorakomunidade iha suku Bemori seidauk bele simu.
“Ha’u sempre simu informasaun hosi ita-nia povu iha Bemori tanba sira mós presiza duni atu hetan direitu ne’e. Tanba Governu mak planea, nune’e empreza ida-ne’ebé mak sai fornesedór ba Cesta Bázika ne’e karik tenke aselera ona,” nia dehan.
Nia dehan, komunidade iha Bemori hamutuk 5.005 ne’ebé seidauk simu Cesta Bázika kompostu hosi aldeia Babaliurai Leste ho totál abitante 1.035, Babaliurai Oeste 606, Bemori Centrál 911, Ailele Hun 521, Has Laran 635, Centro 824 no aldeia My Friend ho totál abitante hamutuk 473.
Entretantu xefe suku Motael, Luis Gusmão Viegas, hateten totál xefe família iha suku Motael ne’ebé atu hetan direitu ba Cesta Bázika hamutuk 1.293 no populasaun hamutuk 6.752 ne’ebé kompostu hosi feto 3.390 no mane 3.362.
“Ami seidauk simu Cesta Bázika, mosu iha fallansu tanba lista ne’ebé ami submete la hanesan ho totál benefisiáriu ne’ebé ami iha, nune’e ami-nia ekipa sei ba konfirma ho Ministériu Administrasaun Estatál,” nia hateten.
Jornalista : Osória Marques
Editór : Cancio Ximenes
