MTKI koordena ho liña ministeriál ba preparasaun partisipa Expo Osaka 2025
DILI, 19 janeiru 2023 (TATOLI)— Diretór Jerál Ministériu Turizmu Komérsiu no Indústria (MTKI), Jelino Soares, hateten Timor-Leste sei partisipa Expo Osaka 2025 iha Japaun, no daudaun ne’e sei iha hela preparasaun nia-laran.
“Relasiona ita-nia preparasaun atu partisipa iha Expo Osaka 2025 iha Japaun ne’e, daudaun ita koordena hela ho liña miniteriál sira hanesan Ministériu Agrikultura no Peska (MAP), no Ministériu Petróleu Minerál, (MPM), atu oinsá ita halo preparasaun aprezenta produtu lokál sira ne’ebé iha atu aprezenta iha Expo ne’e rasik,” Jelino Soares dehan ba Agência Tatoli, iha nia knaar-fatin, Farol Dili, kinta ne’e.
Nia dehan, Timor-Leste nia preparasaun atu partisipa iha Expo Osaka ne’e di’ak tebes, tanba Timor-Leste iha rekursu naturál hanesan setór turizmu no produtu hosi agrikultura mak kafé, ai-kameli no seluk tan. Ida ne’e bele hatudu liuhosi Expo ne’e rasik.
“Tanba ita iha rikusoin barak ne’ebé bele hatudu liuhosi expo ne’e, maibé importante mak tenke aprezenta ita-nia lei investimentu nian iha Expo atu investór sira ba ne’e bele haree no hatene atrai mai Timór,” Jelino hateten.
Ne’ebé daudaun ne’e, MTKI mós halo hela preparasaun kona-ba lei investimentu sira iha Timor-Leste, nune’e bainhira aprezenta iha expo ne’e investór sira husu bele halo esplikasaun ba sira.
“Lei investimentu ba área turizmu nian daudaun ne’e, Governu prepara hela dekretu lei kona-ba investimentu iha área turizmu. Dekretu lei ne’e rasik, submete ona ba Prezidénsia Konsellu Ministru nia meza, hodi haree atu aprezenta iha Konsellu Ministru,” nia hateten.
Diretór Jerál MTKI ne’e dehan, iha área turizmu presiza iha dekretu lei ne’e, ho objetivu aban bainrua iha investór ruma hakarak mai investe iha Timór tenke iha regulamentu ida atu regula.
Aleinde MTKI koordena ho liña ministeriál sira halo preprasaun produtu ba Expo Osaka ne’e, no Governu mós nu’udar Estadu ida sei kria ekipa organizasaun ba Expo Osaka 2025 hodi hili pavilliaun ida hanesan uluk Timor-Leste partisipa iha Expo Dubai.
“Kon-ba Pavilliaun ne’e rasik ita halo kontaktu ho komisaun organizadora Expo Osaka nian liuhosi nia Embaixada Japaun iha Timor-Leste, oinsá ita atu hetan rekezitu sira hodi prienxe iha pavilliaun ne’e. Tanba pavilliaun ne’e kompostu A,B,C. No pavilliaun C ne’e rasik ba nasaun sira sub-dezenvolvidu,” nia dehan.
Jornalista : Arminda Fonseca
Editora : Armandina Moniz
