OÉ-CUSSE, 19 janeiru 2023 (TATOLI) – Prezidente Autoridade RAEOA, Arsénio Paixão Bano, kinta ne’e lansa instalasaun solár-sel ba komunidade uma-kain 216 mai hosi sub-rejiaun haat, Oésilo, Pássabe, Nítibe no Pante Makasar hodi kompleta asesu liña elétrika 100% iha territóriu Oé-Cusse.
Lansamentu ne’e, Autoridade RAEOA hamutuk ho komunidade sira la’o ain kuaze kilómetru tolu hodi lansa dahuluk ba uma-kain 16 iha bairru izoladu Kutete, aldeia Mahata, suku Costa, sub-rejiaun Pante Makasar.
Notísia relevante: “Populasaun Oe-cusse 95% asesu ona ba eletrisidade – TATOLI Agência Noticiosa de Timor-Leste” https://tatoli.tl/2018/08/22/populasaun-oe-cusse-95-asesu-ona-ba-eletrisidade/
Prezidente Autoridade RAEOA, Arsénio Paixão Bano, hatete, iha mandatu Primeiru Prezidente Autoridade, Mari Alkatiri konsege rezolve ona 96%, nune’e iha tinan 2023 autoridade kompleta ba 100 hodi kobre hotu área izoladu ne’ebé dook hosi rede distribuisaun.
“Ohin halo lansamentu ba programa solár-sel, ba uma-kain 216 iha sub-rejiaun haat tanba hela dook hosi rede distribuisaun liña eletrisidade, entaun ha’u hakarak informa ba públiku katak ita bele atinje ona 100%, uma-kain hotu-hotu iha Oé-Cusse hetan eletrisidade,” Arsénio Paixão Bano, informa, ba jornalista sira iha suku Naimeko.
Tuir nia, instalasaun solár-sel ne’e, seidauk konta ho uma-kain foun, maibé planu ne’ebé trasa iha 2022 to’o tinan ne’e eletrisidade ba territóriu Oé-Cusse, iha aldeia 63 autoridade konsege identifika, no halo projetu hodi rezolve.
“Instalasaun ne’e inklui bairru izoladu Biele, Nítibe iha uma-kain 23, tanba fatin ne’e izoladu liu iha Oé-Cusse, entaun programa tinan kotuk, tinan ida-ne’e ita realiza atu solar-sel ba sira,” nia afirma.
Iha biban ne’e, komunidade sira hanesan iha bairru Kutete, Jaime Neno no Jacinta Koa, agradese ba polítika Autoridade RAEOA tanba tinan ne’e hahú oferese ona apoiu ona naroman eletrisidade ba komunidade sira-ne’ebé hela iha área izoladu.
“Ha’u sente ksoolok tebes tanba iha tempu naruk nia laran ami hela iha bairru rurál ne’e susar tebes, dezde tempu portugés to’o Indonézia nia tempu to’o ita ukun-an tinan 22 ona, mais agora Autoridade RAEOA fó ona solár-sel iha ami-nia bairru agora ami senti di’ak ona no naroman daudaun ona,” Jaime Neno agradese.
Jacinta Koa, reforsa, antes seidauk hetan solár-sel komunidade ho inisiativa uza ai-kamí no uza mina hodi uza fó naroman iha tempu kalan, maibé agora ba oin ami sei la susar ona tanba solár-sel instala daudaun ona.
“Ohin, ami kontente tanba Governu lori ona naroman mai ami iha idak-idak nia uma, estrada mós tama ona, bee-moos tama ona, tanba ami iha Kutete ne’e izoladu, tanba ami-nia hela fatin dezde uluk kedas,” nia katak.
Entretantu, projetu instalasaun ba solár-sel ne’e, ezekuta hosi empreza Vitarly Unipesoál, Lda, ho valór kontratu hamutuk $155,199.52, orsamentu ne’e Autoridade RAEOA aloka hosi Orsamentu Jerál Estadu (OJE) 2022 nian.
Durasaun servisu ba projetu ne’e sei ezekuta durante fulan haat, hahú hosi fulan Novembru 2022 sei termina iha fevereiru 2023.
Notísia relevante: https://tatoli.tl/2021/10/27/raeoa-aloka-millaun-1-resin-instala-lina-eletrisidade-iha-sub-rejiaun-haat/
Jornalista: Abílio Elo Nini
Editór: Evaristo Soarer Martins
