STAE Baucau hahú halo resensiamentu eleitorál iha postu administrativu
BAUCAU, 19 janeiru 2023 (TATOLI) – Sekretariadu Tékniku Administrasaun Eleitorál (STAE) munisípiu Baucau hahú hikas resensiamentu eleitorál iha postu admistrativu neen.
Diretór STAE Baucau, Natividade Freitas, esplika, resensiamentu eleitorál ne’e halo hafoin iha fulan-janeiru ne’e kontratu hikas ofisiál no asistente operadór sistema hamutuk 12 ne’ebé dezkola ba kada postu admistrativu na’in-rua.
“Sira prontu atende eleitór sira-ne’ebé atu atualiza dadus no resensiamentu eleitorál kada postu,” Diretór STAE Baucau informa ba Agência TATOLI iha Vila Nova, kinta ne’e.
Durante hala’o servisu iha postu, funsionáriu sira sei hala’o resensiamentu eleitorál, atualizasaun baze dadus hanesan eleitór ne’ebé muda hela fatin no troka naran hahú iha loron-17 janeiru no tuir planu sei finaliza iha fulan-juñu.
Resensia eleitóral foun bazeia ba Lei númeru 19/2021, loron 8 fulan-setembru alterasaun dahuluk hosi lei númeru 6/2016, 25 maiu kona-ba resensiamentu eleitorál ne’ebé obrigatóriu, ofisiozu, únika no universál sempre atualiza hodi hasoru kualkér eleisaun.
Totál eleitór tinan-2022 iha munisípiu Baucau hamutuk 96,704, iha aumentu eleitorál hamutuk 1. 925 ne’ebé mai hosi eleitór foun idade 17 iha munisípiu Baucau.
Jornalista : Natalino Belo
Editór : Evaristo Soares Martins
