VIQUEQUE, 19 janeiru 2023 (TATOLI)— Diretór Serbisu Edukasaun Munisípiu Viqueque, Domingos Brandão, hateten implementasaun merenda eskolár ba tinan 2023 ne’e ba estudante sira iha eskola privadu sira iha munisípiu Viqueque hahú asesu hotu ona.
“Ami diskute ona Ministériu Adiministrasaun Estatál (MAE) katak merenda eskolár ba tinan ida-ne’e eskola katolíka ka privadu sira Viqueque mós sei asesu hotu”, hateten Domingos Brandão, ba jornalista sira, iha ninia kna’ar fatin, Beloi, kinta ne’e.
Eskola katólika (privada) asesu merenda eskolár hanaesan hahán de’it hodi estudante sira bele han iha eskola, maibé orsamentu sei tau iha eskola sentru maka distribui ba eskola privada sira.
“Ba tinan ida-ne’e mós implementa merenda eskolár iha prosedimentu foun, tanba uluk ita-nia Gabineti Apoiu Tékniku (GAT) Edukasuan Viqueque maka jere merenda eskolár. Maibé ba tinan ida-ne’e eskola sentru sira maka sei jere orsamentu ba merenda eskolár, hafoin sira haree ba eskola filiál sira. Daudaun ne’e ami sei iha faze preparasaun iha tempu badak nian laran implementa ona merenda eskolár”, nia afirma.
Nune’e, nia dehan edukasaun munisípiu Viqueque sei fó formasaun ba grupu implementasaun programa merenda eskolár, hafoin ramata formasaun mak bele implementa durante loron 164, ba tinan ida-ne’e ho kada estudante ida hetan sentavu 35.
“Merenda eskolár tinan ida-ne’e aloka tuir kada estudante ida sei hetan sentavu 35, kompara ho tempu uluk kada estudante ida hetan sentavu 0.25”, nia afirma.
Tuir dadus ensinu báziku sentral públiku iha munisípiu Viqueque hamutuk 18, Pre-Eskolá 35, eskola filiál 77 no ensinu báziku privada ualu maka sei sai benefisiáriu ba merenda eskolár.
Jornalista: Vitorino Lopes da Costa
Editór : Florencio Miranda Ximenes
