DILI, 19 janeiru 2023 (TATOLI) – Ministru Transporte no Komunikasaun (MTK), José Agustinho da Silva, hateten planu dezenvolvimentu ba transformasaun Portu Dili sai zona turístika no portu kruzeiru sira iha ona faze estudu viabilidade.
“Konsellu Ministru aprova ona planu investimentu ida ne’e, prosesu la’o hela no USAID mak halo hela estudu viabilidade”, José Agustinho dehan, iha Palásiu Governu, segunda ne’e.
Governante ne’e iha esperansa katak molok mandatu Governu Daualuk ramata bele realiza ona lansamentu hodi hatuur fatuk dahuluk ba planu investimentu refere.
“Tanba iha reuniaun Konsellu Administrasaun Fundu Infraestrutura (KAFI), ha’u haree karta ida hosi Autoridade Portuária Timor-Leste ligadu ho planu ne’e”, nia haktuir.
Projetu ne’e ho modalidade Parseria Públiku-Privada (PPP) ho kustu estimativu millaun $50-resin atu transforma Portu Dili sai hanesan pontu turizmu ne’ebé sei inklui ekipamentu kulturál, rekreativu no rezisténsia.
Projetu ne’e sei kria empregu no fornese oportunidade komersiál ba rezidente sira iha Dili, halo kapitál sai furak liután hodi bele atrai turista doméstika no internasionál iha futuru.
Notísia relevante : https://tatoli.tl/2021/07/28/governu-planeia-transforma-portu-dili-sai-zona-turistika/
Jornalista: Antónia Gusmão
Editora: Maria Auxiliadora
