DILI, 20 janeiru 2023 (TATOLI)— Governu liuhosi Sekretária Estadu Formasaun Formasaun Profisionál no Empregu (SEFOPE) no Diresaun Nasionál Empregu Exteriór (DNEE) tuir planu iha tinan 2023 sei haruka tan traballadór ba Austrália hamutuk 8.000 no Korea Súl hamutuk 1.500.
“Ita-nia planu ba tinan ne’e sei haruka traballadór timor-oan ba rai-liur hamutuk 9.500. Hosi número ne’e bá Korea Súl hamutuk 1.500 no Austrália hamutuk 8.000,”Filomeno Soares hateten, liuhosi nota komunikadu ne’ebé Agência Tatoli, asesu sesta ne’e.
Nia dehan, tinan ne’e Governu hasa’e númeru traballadór ba rai-liur tanba iha tinan 2022 susesu boot ne’ebé ekipa hosi Diresaun Nasionál Empregu Exteriór halo tuir Memorandum Intendimentu ne’ebé Governu Korea Súl fó ba Timor-Leste. Iha memorandum ne’e, kada tinan haruka Timor-oan ba servisu iha Korea Súl ema na’in 500, maibé iha tinan 2022 konsege haruka joven Timor-oan 1.160 hodi hetan servisu iha Korea Súl.
Nune’e mobilizasaun traballadór ba servisu iha Australia tuir planu ne’ebé SEFOPE no DNEE planeia kada tinan haruka joven timor-oan ba hetán servisu iha Australia hamutuk 1500 to’o 2000. Maibé, iha tinan 2022 SEFOPE liuhosi DNEE konsege haruka joven Timor-oan hamutuk 3.514.
“Ita haree ba númeru traballadór timor-oan ne’ebé SEFOPE haruka ba servisu iha nasaun Austrália no Korea Súl liu tarjetu ne’ebé iha. Tanbá ne’e iha tinan 2023 SEFOPE liu-husi DNEE iha planu sei haruka joven Timor-oan ba servisu iha Korea Súl hamutuk 1500 no ba Australia ho total 8.000 no sei espanda tán ba Japaun tinan ne’e haruka 50 sai hanesan pilotu ida,” nia hateten.
Jornalista : Arminda Fonseca
Editora : Armandina Moniz
