iklan

NASIONÁL, EDUKASAUN, DILI, HEADLINE

Edukasaun Bobonaro presiza tán karteira eskolár 165 ba eskola foun

Edukasaun Bobonaro presiza tán karteira eskolár 165 ba eskola foun

Ilustrasaun karteira eskolár. Imajen/Espesiál

DILI, 20 janeiru 2023 (TATOLI)–Servisu Edukasaun Munisípiu Bobonaro sei presiza tan karteira eskolár 165 hodi koloka ba eskola foun rua.

Diretór Servisu Edukasaun Munisípiu Bobonaro (DSEMB), Crispim Lopez Moniz relata, eskola edukasaun pre-eskolár Badut Mean no Ensinu Báziku Filiál (EBF) Tapo ne’ebé foin harii seidauk iha karteira eskolár, tanba ne’e husu ona karteira eskolár hamutuk 165 atu apoia eskola rua refere.

“Ha’u hakarak dehan de’it katak agora daudaun ha’u seidauk submete proposta ba nasionál maibé verbalmente ha’u informa ona ba nasionál no sira husu ha’u tenke aprezenta proposta atu ministériu bele konsidera,” Crispim Lopes hatete ba Agência Tatoli liuhosi telefónika, sesta ne’e.

Nia informa, eskola foun rua Badut Mean no Tapo ne’e hetan ona identifikasaun no hosi Edukasaun Pre-Eskolár Badut Mean rasik sei presiza tán karteira eskolár hamutuk 50 no eskola Ensinu Báziku Filiál (EBF) Tapo presiza tan karteira eskolár hamutuk 115.

Proposta ne’ebé nia sei prepara ne’e sei dirije ba Ministru Edukasaun atu nune’e bele hetan lalais desizaun, nune’e bele apoiu eskola rua refere tanba eskola rua ne’e rasik instala ona iha área fronteira terrestre Timor ho Indonézia nian, nune’e bele fasilita labarik timoroan sira iha fronteira bele asesu ba edukasaun ida di’akliu.

Ko’alia kona-ba karteira eskolár, nia dehan, antes ne’e edukasaun munisípiu Bobonaru hetan ona distribuisaun karteira eskolár hamutuk 2.235 hosi nasionál hodi apoiu ba eskola hamutuk 26 ne’ebé eziste iha Bobonaru.

Eskola sira-ne’e mak hanesan Edukasaun Pre-Eskolár tolu (3), Ensinu Báziku 19, Eskola TEKVOK tolu (3) no Sekundáriu Jerál ida (1).

“Antes ne’e, ita mós simu ona apoiu karteira eskolár hamutuk 2.235. Karteira eskolár sira-ne’e distribui hotu ona ba eskola hamutuk 36 iha Bobonaro,” nia dehan.

Jornalista : Tomé Amado

Editór       : Cancio Ximenes

iklan
iklan

Leave a Reply

iklan
error: Content is protected !!