COVALIMA, 20 janeiru 2023 (TATOLI)–Servisu Edukasaun Munisápal Covalima seidauk fó sai rezultadu verifikasaun dokumentu profesór sira-ne’ebé submete ba edukasaun Covalima.
“La kle’ur tan, ami sei fó sai rezultadu verifika dokumentu profesór sira-nian iha tempu badak, tanba sei hein Ministériu Edukasaun Juventude no Desportu (MEJD) atu asina,” Diretór Servisu Edukasaun Covalima, Rui Amarál Suri Seran, hateten ba Agência Tatoli, iha resintu AMC Sukaer Laran, sesta ne’e.
Profesór sira submete dokumentu bazea ba vaga ne’ebé fó sai hosi Ministériu Edukasaun Juventude no Desportu liuhosi servisu edukasaun Covalima hodi fó sai iha kuadru avizu servisu edukasaun Covalima.
“Tuir loloos 75 sa’e ba 125 no hosi númeru ne’e hira mak seidauk iha rezultadu finál ne’e seidauk iha depois mak ita-boot sira rona nia rezultadu tanba sei sei hein de’it desizaun,” nia hateten.
Hafoin servisu edukasaun Covalima fó sai vaga refere profesór na’in-272 no hosi númeru ne’e profesór na’in-256 mak submete de’it sira-nia dokumentu.
Tuir kritéria haree ba profesór sira-nia durasaun servisu hanesan professor sira-ne’ebé hahú hanorin iha tinan 2007 to’o 2017, maibé ba sira-ne’ebé foin hahú hanorin iha tinan 2018 mai oin entaun pasiénsia tenke hein tempu seluk.
Tanba vaga ne’ebé Ministériu Edukasaun Juventude no Desportu (MEJD) fó sai liuhosi Servisu Edukasaun Munisípiu Covalima, presiza de’it profesór na’in-75 maibé profesór na’in-256 mak submete ona sira-nia dokumentu nune’e presiza verifika ho didi’ak.
Jornalista : Celestina Teles
Editór : Cancio Ximenes
