Grupu komunitáriu finaliza konstrusaun eskola Cabira-Oan iha Viqueque

VIQUEQUE, 20 janeiru 2023 (TATOLI)— Diretór Serbisu Edukasaun Munisípiu Viqueque, Domingos Brandão, informa grupu komunitáriu finaliza ona konstrusaun eskola ensinu báziku Cabira-oan, iha postu Viqueque no daudaun hein inaugurasaun hosi Ministériu Edukasaun Juventude no Desportu (MEJD).

“Progresu konstrusaun eskola komunitária ne’e eskola Cabira-Oan maka finaliza 100%, tuir loloos Ministériu halo inaugurasaun, maibé seidauk tanba tenke hetan inaugurasaun hosi nivél nasionál”, Domingos Brandão, hateten Agência TATOLI,I.P iha kna’ar fatin, Beloi, sesta ne’e.

Tuir planu, MEJD sei halo inaugurasaun ba eskola komunitária nivél nasionál sei realiza iha munisípiu Baucau, iha eskola Mau-Cali iha fulan janeiru ne’e, hafoin inaugurasaun ba eskola komunitária nivél minisípiu Viqueque nian realiza iha eskola Uaimori, postu Viqueque-Vila.

Projetu komunitáriu resposavél hosi grupu komunitáriu sira iha munisípiu Viqueqeu hamutuk 18 no eskola tolu maka empreza sira mak ka’er.

iha fulan ne’e, eskola lima mak besik atu finaliza tan tanba pagamentu atinje ona 75% no tékniku hosi MEJD sira mós halo ona identifika ba eskola lima.

Alokasaun orsamentu ba projetu komunitária 18 iha munisípiu Viqueque hamutuk $1.781.991,95. Nune’e, munisípiu Viqueque hahú halo konstrusaun iha fevereiru 2022.

“To’o agora ita-nia eskola balun konstrusaun seidauk hotu, tanba impaktu udan, nune’e difikulta ba prosesu konstrusaun tanba tempu udan fatin balun karreta labele asesu hodi distribui materiál konstrusaun. Maibé ita-nia grupu sira kontinua esforsu halo konstrusaun hodi finaliza obra komunitária”, nia garante.

Jornalista: Vitorino Lopes da Costa

Editór      : Florencio Miranda Ximenes